సంక్రాంతి సందడంతా వెంకీదే!

సంక్రాంతి సినిమాలలో చివరిగా రిలీజ్ అయింది 'F2'. కానీ ప్రస్తుతం ఈ సినిమాకు వస్తున్న రెస్పాన్స్ చూస్తుంటే సంక్రాంతి సీజన్ విజేతగా నిలిచే అవకాశం ఉందనే అభిప్రాయం వినిపిస్తోంది. రజనీ 'పెట్టా' కలెక్షన్స్ పూర్తిగా డల్ గా ఉన్నాయి కాబట్టి ఆ సినిమాను పక్కన బెట్టేస్తే మిగిలినవి రెండు.. 'ఎన్టీఆర్ కథానాయకుడు'.. 'వినయ విధేయ రామ'. ఈ రెండూ సినిమాల ప్రీ రిలీజ్ భారీగా జరగడంతో బ్రేక్ ఈవెన్ మార్కు చేరాలంటే కనీసం రెండు వారాలు హౌస్ ఫుల్స్ తో రన్ అవ్వాలని అంటున్నారు. కానీ 'F2' కు ఇంత భారీ టార్గెట్ లేకపోవడం ప్లస్ గా మారింది.

సినిమా సెకండ్ హాఫ్ వీక్ అని.. లాజిక్ లేని సీన్లు ఉన్నాయని క్రిటిక్స్ యావరేజ్ గా తేల్చారు గానీ ప్రేక్షకులు మాత్రం సెకండ్ హాఫ్ ను పెద్దగా పట్టించుకోకుండా 'F2' సినిమాను హిట్ గా నిలిపేలా ఉన్నారని కలెక్షన్ రిపోర్ట్స్ చెబుతున్నాయి. రిలీజ్ రోజు మొదటి షో కంటే ఫస్ట్ షో సెకండ్ షోకు కలెక్షన్స్ పెరగడం అదే సూచిస్తోంది. సినిమాలో వెంకీ తనదైన కామెడీ టైమింగ్ తో అందరినీ క్లీన్ బౌల్డ్ చేశాడు. సినిమాను ఒంటి చేత్తో నిలబెట్టాడంటే కూడా అది అతిశయోక్తి కాదు. వరుణ్ కు కామెడీ కొత్త కావడంతో అంతా వెంకీ డామినేషనే. వెంకీ ఆసన్ వేయడం దగ్గరనుండి.. తన భార్యవల్ల పడే బాధలను 'మగ' కుక్కతో దీనంగా చెప్పుకోవడం లాంటి సీన్లు ప్రేక్షకులను పొట్టచెక్కలయ్యేలా నవ్విస్తున్నాయి.

వెంకీ కి మొదటి నుంచి ఫ్యామిలీ ఆడియన్స్ లో క్రేజ్ ఎక్కువ. దీంతో రానున్న రోజుల్లో వెంకీ కోసం ఫ్యామిలీ ఆడియన్స్ థియేటర్లు వచ్చే అవకాశం ఉంది. చూస్తుంటే బాక్స్ ఆఫీస్ చేత కూడా 'వెంకీ ఆసన్' వేయించేలా ఉన్నాడు.