తమిళ్ స్టార్ హీరోతో వెంకీ మరో మల్టీస్టారర్!

తెలుగులో మల్టిస్టారర్ల పండగ జరుగుతోంది.. కాదు కాదు జాతర. ఇప్పటికే పలు మల్టిస్టారర్లు సెట్స్ పై ఉండగా మరి కొన్ని మల్టిస్టారర్లు ప్లానింగ్ దశలో ఉన్నాయి. తాజాగా మరో క్రేజీ మల్టిస్టారర్ కు సంబంధించిన అప్డేట్ బయటకు వచ్చింది. ఇప్పటికే ఎన్నో మల్టిస్టారర్ సినిమాల్లో నటించి ఒక ట్రెండ్ ను సృష్టించిన విక్టరీ వెంకటేష్ ఈ సినిమాలో ఒక హీరో.

రెగ్యులర్ స్టైల్ కు భిన్నంగా ఈసారి వెంకటేష్ ఒక తమిళ్ స్టార్ తో జట్టు కడుతుండడం విశేషం. సూర్య తమిళంలోనే కాకుండా తెలుగులో కూడా మంచి ఫాలోయింగ్ ఉన్న హీరో. సూర్య ఈ సినిమాలో 20 నిముషాల పాత్రలో కనిపిస్తాడట. త్రినాధ రావు నక్కిన దర్శకత్వంలో తెరకెక్కనున్న ఈ క్రేజీ మల్టిస్టారర్ ను సురేష్ ప్రొడక్షన్స్ బ్యానర్ పై D. సురేష్ బాబు నిర్మిస్తారట. ఈ సినిమాలో మరో ఇంట్రెస్టింగ్ విషయం ఏంటంటే వెంకటేష్ - సూర్య ఇద్దరూ పవర్ ఫుల్ పోలీస్ ఆఫీసర్ పాత్రలలో నటించడం.

ఎలాగూ సూర్య ఉంటాడు కాబట్టి ఈ సినిమా తమిళంలో కూడా రిలీజ్ కావడం ఖాయం. అంటే లేటుగా అయినా వెంకటేష్ కోలీవుడ్ కు లేటెస్ట్ గా ఎంట్రీ ఇస్తున్నట్టే. వెంకటేష్ ఇప్పటికే రెండు మల్టిస్టారర్ సినిమాల్లో నటిస్తున్నాడు. అందులో ఒకటి వరుణ్ తేజ్ తో కలిసి నటించే 'F 2'.. రెండోది నాగచైతన్యతో కలిసి నటించే 'వెంకీమామ'.