సిట్టిబాబుకు సిన్న మచ్చ కూడా లేదయ్యా

ఎలాంటి గొప్ప సినిమాకు అయినా లోట్లు వెతకడం కనిపిస్తూనే ఉంటుంది. తీసి పారేయదగ్గ కొన్ని పాయింట్లను పట్టుకుని వెటకారం ఆడడం కూడా కనిపిస్తుంది. కానీ రంగస్థలం మూవీ విషయంలో ప్రశంసలు తప్ప అసలెక్కడా విమర్శలే రావడం లేదంటే.. రామ్ చరణ్ సాధించిన సక్సెస్ ఏ రేంజ్ లో ఉందో అర్ధం అవుతుంది.

ప్రతీ ఒక్కరూ రంగస్థలం మూవీని ఆకాశానికి ఎత్తేస్తున్నారు. దర్శకుడు సుకుమార్ విజన్ ను.. ఆ చిత్రాన్ని రూపొందించిన తీరును.. చిట్టిబాబుగా రామ్ చరణ్ చూపించిన అసమాన నటనను అందరూ ప్రశంసలు కురిపిస్తున్నారు. ఇండస్ట్రీలో ప్రతీ ఒక్కరూ ఈ సినిమా గురించి మాట్లాడుతూనే ఉన్నారు. ఇప్పుడు ఈ జాబితాలోకి సీనియర్ స్టార్ హీరో వెంకటేష్ కూడా చేరిపోయాడు. 'రంగస్థలం సినిమా చూశాను.. చిట్టిబాబుగా చరణ్ చిన్న వంక కూడా పెట్టలేనంత పర్ఫెక్ట్ గా జీవించేశాడు. ఇలాంటి క్యారెక్టర్లను ఇంత అద్భుతంగా మలిచినందుకు సుకుమార్ కు హ్యాట్సాఫ్. మైత్రీ మూవీ మేకర్స్ తో పాటు మొత్తం టీం అంతటికీ అభినందనలు' అంటూ తన సోషల్ మీడియా పేజ్ లో పోస్ట్ చేశాడు వెంకటేష్.

ఒక క్యారెక్టర్ ను ఏ కొంచెం కూడా లోటు లేకుండా.. ఆ పాత్ర అలా ఎందుకు ప్రవర్తించింది అనే ప్రశ్న కూడా ఎవరికీ తలెత్తనంత పర్ఫెక్ట్ గా మూవీ ఉందంటే.. సుకుమార్ ప్రతిభ ఏపాటిదో అర్ధమవుతుంది. అందుకే మరి.. చంద్రుడికైనా మచ్చలు ఉంటాయేమో కానీ.. చిట్టిబాబుకు చిన్న మచ్చ కూడా కనిపించడం లేదు జనాలకి.