'నారప్ప'ను ముగించేసారు..!

విక్టరీ వెంకటేష్ నటిస్తున్న తాజా చిత్రం 'నారప్ప'. శ్రీకాంత్ అడ్డాల ఈ యాక్షన్ థ్రిల్లర్ కి దర్శకత్వం వహిస్తున్నాడు. సురేష్ ప్రొడక్షన్స్ బ్యానర్‌ పై సురేష్ బాబు మరియు క‌లైపులి ఎస్.థాను సంయుక్తంగా ఈ చిత్రాన్ని నిర్మిస్తున్నారు. ఇది తమిళ్ లో ధనుష్ నటించిన సూపర్ హిట్ మూవీ 'అసురన్' కి రీమేక్ గా రూపొందుతోంది. ఇందులో నారప్ప భార్య సుందరమ్మగా హీరోయిన్ ప్రియమణి నటించగా.. తనయుడిగా కార్తీక్ రత్నం నటించాడు. తాజాగా ఈ సినిమా షూటింగ్ కంప్లీట్ అయినట్లు వెంకటేష్ తన ట్విట్టర్ ఖాతా ద్వారా వెల్లడించారు.

వెంకటేష్ ట్వీట్ చేస్తూ ''నారప్పతో నా ప్రయాణం నేటితో పూర్తయింది. ఈ సినిమా విడుదల కోసం వెయిట్ చేయండి'' అని పేర్కొన్నాడు. ఇకపోతే మే14న ‘నారప్ప’ చిత్రాన్ని థియేటర్‌ లలో విడుదల చేయనున్నట్లు ఇటీవలే మేకర్స్ ప్రకటించారు. ఇది వెంకీ కెరీర్ లో వస్తున్న 74వ చిత్రం. ఈ చిత్రానికి మణిశర్మ సంగీతం సమకూరుస్తుండగా.. శ్యామ్ కె నాయుడు సినిమాటోగ్రఫీ అందిస్తున్నారు. మార్తాండ్ కె. వెంకటేష్‌ ఎడిటర్ గా.. గాంధీ నడికుడికర్‌ ఆర్ట్ డైరెక్టర్ గా చేస్తున్నారు. ఇక వెంకీ ఈ మూవీ అనంతరం 'ఎఫ్ 3' సినిమా షూటింగ్ ‏లో పాల్గొంటున్నాడు.