అల్లుడిని అలా టార్చ‌ర్ చేస్తాడ‌ట‌!

ప‌ల్లెటూళ్లో మామా- అల్లుళ్ల స‌ర‌సాలు మామూలుగా ఉంటాయా? మామ‌తో అల్లుడి స‌ర‌సం ర‌క్తి క‌ట్టిస్తుంది. జోకులు.. పంచ్ లు అంతే ఇదిగా పేల్తాయి. క‌లిసి పార్టీలు చేసుకోవ‌డాలు.. మందేసి తంద‌నాలు ఆడ‌డాలు ఇవ‌న్నీ మామూలే. అల్లుడు చేసే త‌ప్పుల్ని వెన‌కేసుకొస్తూ ఇంట్లో మామ ఎంతో వెన్ను ద‌న్నుగా నిలుస్తాడు. అయితే అదంతా విలేజీలో మామ‌- అల్లుళ్ల కెమిస్ట్రీ గురించి. అయితే వెంకీ మామలో మాత్రం కాస్తంత ఎక్స్ ట్రా క్వాలిటీస్ కూడా ఉన్నాయట‌. అల్లుడి చెవిలో న‌స పెట్టేసే క్వాలిటీ కూడా ఉంద‌ట‌. మామ వ‌ల్ల అల్లుడికి థ్రెట్ మామూలుగా ఉండ‌ద‌ని.. అందులోంచి కూడా బోలెడంత ఫ‌న్ పుడుతుంద‌ని చెబుతున్నారు.

అయితే మామ‌లో ఆ ఎక్స్ ట్రా క్వాలిటీ ఏంటి? అని ఆరాతీస్తే.. వెంకీ మామ‌కు జాత‌కాల పిచ్చి ఒక రేంజులో ఉంటుంది. ప్ర‌తిదానికి వ‌ర్జ్యం దోషం అంటూ స‌తాయిస్తాడు. ప్ర‌తిసారీ జాత‌కం చూపించాలంటూ న‌స పెట్టేస్తాడ‌ట‌. జ్యోతిష్యం- జాత‌కాల పిచ్చి అనే ఎలిమెంట్ హిలేరియ‌స్ గా కామెడీని క్రియేట్ చేస్తుంద‌ని తెలుస్తోంది. మామ పిచ్చిని భ‌రించ‌లేని అల్లుడి పాట్లు ఏమిట‌న్న‌ది క‌డుపుబ్బా న‌వ్వించేస్తాయ‌ట‌. ఆ సీన్లు చాలా బాగా కుదిరాయ‌ని చిత్ర‌యూనిట్ నుంచి లీకైంది. ఇకపోతే ఈ చిత్రంలో నాగ‌చైత‌న్య ఆర్మీ అధికారిగా క‌నిపిస్తాడ‌ని ఇదివ‌ర‌కూ లీకైంది. అయితే మిల‌ట‌రీకి వెళ్లి ఆ క‌ష్టాలు భ‌రించ‌లేక‌ తిరిగి వ‌చ్చేసే అల్లుడా? అన్న‌ది చూడాలి.

`వెంకీ మామ` తొలి పోస్ట‌ర్ వేసిన‌ప్ప‌టి నుంచి ఈ సినిమాపై అంచ‌నాలు పెరిగాయి. అంతకుమించి ఎంచుకున్న‌ క‌థాంశంపై ర‌క‌ర‌కాల గాసిప్స్ వినిపిస్తున్నాయి. దేశ‌భ‌క్తి ఉన్న మామ‌- అల్లుళ్ల క‌థ‌లో బోలెడంత సంఘ‌ర్ష‌ణ‌- ఎమోష‌న్ వ‌ర్క‌వుటవుతాయ‌ని ఇదివ‌ర‌కూ ప్ర‌చార‌మైంది. అయితే అస‌లు స్టోరి లైన్ ఏమిటి? అన్న‌ది అధికారికంగా రివీల్ కానేలేదు. ఈ చిత్రంలో రాశీఖ‌న్నా- పాయ‌ల్ రాజ్ పుత్ గ్లామ‌ర్ యూత్ కి అదిరిపోయే ట్రీటిస్తుంద‌ట‌. వెంక‌టేష్ - చైత‌న్య ప్ర‌ధాన పాత్ర‌ల్లో బాబి ద‌ర్శ‌క‌త్వంలో సురేష్ ప్రొడ‌క్ష‌న్స్ - పీపుల్స్ మీడియా ఫ్యాక్ట‌రీ సంస్థ‌లు సంయుక్తంగా నిర్మిస్తున్నాయి.