బంగారం బాబుతో కబాలి కబడ్డీ!!

వెంకటేష్ చాలా కాలం తర్వాత సోలో హీరోగా తెలుగులో డైరెక్టుగా ఓ సినిమా చేశాడు. అదే మారుతి దర్శకత్వంలో వస్తున్న బాబు బంగారం. దీనికి ముందు వెంకీ చేసిన సినిమా గోపాలా గోపాలా. ఇందులో పవన్ కళ్యాణ్ ప్రధాన పాత్రలో కనిపించడమే కాదు.. మొత్తం అటెన్షన్ అంతా పట్టుకెళ్లి పోయాడు. దీనికి ముందు దృశ్యం వచ్చినా అది రీమేక్ మూవీ. దానికి ముందు మసాలా అంటూ రామ్ తో కలిసి మల్టీ స్టారర్ చేసిన వెంకీ.. అంతకు ముందు 2013లో షాడో మాత్రమే సోలో హీరోగా చేసిన డైరెక్ట్ మూవీ.

మళ్లీ ఇప్పుడు మూడేళ్లకు రీమేక్ తో కాకుండా వెంకటేష్ నేరుగా ప్రేక్షకుల ముందుకు వస్తున్నాడు. మారుతి దర్శకత్వం వహించడం.. నయనతారతో మూడోసారి జత కట్టడంతో.. ఈ చిత్రంపై ఇండస్ట్రీలో బజ్ బాగానే ఉంది. అయితే రిలీజ్ విషంయలోనే సూపర్ స్టార్ అడ్డొచ్చేస్తున్నాడు. రజినీకాంత్ నటించిన కబాలి మూవీకి విడుదల డేట్ ని అనౌన్స్ చేస్తే.. దానికి అనుగుణంగా కొంత గ్యాప్ ఇచ్చి థియేటర్లలోకి రావాలన్నది వెంకీ-మారుతిల ఆలోచన. అందుకే జూలై 15న కబాలి వస్తుందనే ఉద్దేశ్యంతో జూలై 29న విడుదల చేయాలని భావించారు.

ఇప్పుడు కబాలి రిలీజ్ సంగతి తేలడం లేదు. అసలు డేట్ ఎప్పుడు అనౌన్స్ చేస్తారో అర్ధం కావడం లేదు. భారీ హైప్ ఉన్న కబాలితో పోటీ పడితే.. రెండింటికీ నష్టం వస్తుందనే ఉద్దేశ్యంతో వెనక్కి తగ్గుతున్నాడు బంగారం బాబు. ఇప్పుడు కబాలిని ఆగస్ట్ కి పోస్ట్ పోన్ చేసే ఛాన్సులు కూడా ఉన్నాయనే టాక్ ఉంది. దీంతో వెంకీకి రిలీజ్ డేట్ ఫిక్స్ చేసుకోవడంలో ఇబ్బందులు ఎదురవుతున్నాయి. కబాలి పై క్లారిటీ ఇవ్వకుండా నిర్మాతలు కబడ్డీ అడుతుండడంతో.. బంగారం బాబుకి ఏం చేయాలో అర్ధం కాని పరిస్థితి ఏర్పడింది.