చిరు కాదంటే బాల‌య్య‌ని న‌మ్ముకుంటున్నాడా?

నాగ‌శౌర్య హీరోగా న‌టించిన `ఛ‌లో` మూవీతో ద‌ర్శ‌కుడిగా ప‌రిచ‌య‌మై తొలి చిత్రంతో మంచి గుర్తింపుని సొంతం చేసుకున్నాడు ద‌ర్శ‌కుడు వెంకీ కుముల‌. ఈ మూవీ త‌రువాత నితిన్ తో `భీష్మ‌` అంటూ సేంద్రియ సేద్యం గురించి వివ‌రించి ఓ రొమాంటిక్ ల‌వ్ స్టోరీని తెర‌కెక్కించిన మంచి విజ‌యాన్ని సొంతం చేసుకున్న వెంకీ కుడుముల గ‌త కొన్ని నెల‌లుగా మెగాస్టార్ చిరంజీవితో క‌లిసి ఓ భారీ మూవీ చేయాల‌ని ప్లాన్ చేసుకుంటున్నాడు. డీవీవీ దాన‌య్య డీవీవీ ఎంటర్ టైన్ మెంట్స్ బ్యాన‌ర్ పై నిర్మించాల‌నుకున్నారు.

ఆ మ‌ధ్య అధికారికంగా ఈ ప్రాజెక్ట్ కు సంబంధించిన ప్ర‌క‌ట‌న‌ని కూడా విడుద‌ల చేశారు. కానీ ఏం జ‌రిగిందో ఏమో తెలియ‌దు కానీ ఆ ప్రాజెక్ట్ ఇంత వ‌ర‌కు పట్టాలెక్క‌లేదు. దానికి సంబంధించిన ఎలాంటి అప్ డేట్ గ‌త కొన్ని రోజులుగా బ‌య‌టికి రావ‌డం లేదు. అంతే కాకుండా మెగాస్టార్ వ‌రుస‌గా ప్రాజెక్ట్ లు చేస్తుండ‌టంతో ఈ ప్రాజెక్ట్ ప‌ట్టాలెక్క‌డం క‌ష్ట‌మ‌నే వార్త‌లు ఫిల్మ్ స‌ర్కిల్స్ లో వార్త‌లు చ‌క్క‌ర్లు కొట్ట‌డం మొద‌లైంది.

దీనిపై ద‌ర్శ‌కుడు వెంకీ కుడుముల కానీ, మేక‌ర్ దాన‌య్య కానీ ఎలాంటి ప్ర‌క‌టన చేయ‌క‌పోవ‌డంతో ఫ్యాన్స్ కూడా చిరుతో వెంకీ కుడుముల ప్రాజెక్ట్ క‌ష్ట‌మ‌ని ఓ నిర్ణ‌యానికి వ‌చ్చేశారు. ద‌ర్శ‌కుడు వెంకీ కుడుముల కూడా ఇదే ఫీలై మ‌రో హీరోని వెతుక్కుంటున్నాడ‌నే వార్త‌లు మొద‌ల‌య్యాయి. ఇదిలా వుంటే చిరుతో ప్రాజెక్ట్ చేయాల‌నుకున్న వెంకీ కుడుముల తాజాగా మ‌రో సీనియ‌ర్ హీరో నంద‌మూరి బాల‌కృష్ణ‌తో ఫ్యామిలీ ఎంట‌ర్ టైన‌ర్ కు ప్లాన్ చేసుకుంటున్నాడ‌ని తెలుస్తోంది.

ఈ మ‌ధ్య కాలంలో సాఫ్ట్ గా సాగే ఫ్యామిలీ ఎంట‌ర్ టైన‌ర్ ల‌ని బాల‌య్య చేయ‌లేదు. ఈ నేప‌థ్యంలోనే వెంకీ కుడుముల చేసిన సినిమాలు త‌న‌కు బాగా న‌చ్చాయ‌ట‌. ఎంట‌ర్ టైన్ మెంట్ తో పాటు ఫ్యామిలీ ఆడియ‌న్స్ ని మెప్పించే సినిమాలు కావ‌డంతో వెంకీ కుడుముల‌తో క‌లిసి అలాంటి సినిమా చేయాల‌నే ఆలోచ‌న‌లో బాల‌య్య వున్నార‌ట‌. ఇప్ప‌టికే త‌న‌కు ఈ విష‌యం చెప్పారని, వెంకీ కుడుముల కూడా బాల‌య్యకు ఓ ఫ్యామిలీ ఎంట‌ర్ టైన‌ర్ స్టోరీని న‌రేట్ చేశార‌ని, దీనికి సంబంధించిన అధికారిక వార్త బ‌య‌టికి రానుంద‌ని వార్త‌లు వినిపిస్తున్నాయి.

ఇదిలా వుంటే నంద‌మూరి బాల‌కృష్ణ ప్ర‌స్తుతం గోపీచంద్ మ‌లినేని డైరెక్ష‌న్ లో `వీర‌సింహారెడ్డి` మూవీలో న‌టిస్తున్నారు. హై వోల్టేజ్ యాక్ష‌న్ డ్రామాగా రూపొందుతున్న ఈ మూవీ వ‌చ్చే ఏడాది సంక్రాంతికి థియేట‌ర్ల‌లోకి రానుంది. ఇక దీని త‌రువాత అనిల్ రావిపూడి డైరెక్ష‌న్ లో బాల‌య్య మ‌రో సినిమాని వ‌చ్చే నెల‌లో మొద‌లు పెట్టబోతున్నారు. ఈ మూవీ త‌రువాతే వెంకీ కుడుముల ప్రాజెక్ట్ ప‌ట్టాలెక్కే అవ‌కాశం వుంద‌ని తెలుస్తోంది.