పబ్లిక్‌ మీటింగ్‌ ఏర్పాటు చేసిన 'వెంకీమామ'

ఎన్నికలు పూర్తి అయిన తర్వాత పబ్లిక్‌ మీటింగ్‌ ఏంటీ, అది కూడా వెంకీ మామ పబ్లిక్‌ మీటింగ్‌ ఏర్పాటు చేయడం ఏంటా అంటూ ఆశ్చర్య పోతున్నారా.. వెంకీ మామ పబ్లిక్‌ మీటింగ్‌ నిజమే కాని, అది సినిమా కోసం. వెంకటేష్‌, నాగచైతన్య కలిసి నటిస్తున్న 'వెంకీ మామ' చిత్రం షూటింగ్‌ బ్రేక్‌ లేకుండా ఏకధాటిగా సాగుతోంది. మామ అల్లుడు ఇద్దరు కూడా మంచి జోరు మీదున్న ఈ సమయంలోనే వెంకీ మామను వదలాలని చిత్ర యూనిట్‌ సభ్యులు భావిస్తున్నారు. అందుకే వెంకీ మామ షూటింగ్‌ శరవేగంగా పూర్తి చేస్తున్నారు.

ప్రస్తుతం ఈ చిత్రం కోసం రామోజీ ఫిల్మ్‌ సిటీలో ఒక భారీ షెడ్యూల్‌ జరుగుతుంది. అందులో భాగంగానే పబ్లిక్‌ మీటింగ్‌ షూటింగ్‌ చేస్తున్నారు. సినిమాలో పబ్లిక్‌ మీటింగ్‌ కథకు సంబంధం ఏంటో కాని, మీటింగ్‌ మాత్రం చాలా కీలకంగా తెలుస్తోంది. అందుకే పెద్ద ఎత్తున జనాలను సమీకరించి ఈ సీన్స్‌ ను చిత్రీకరిస్తున్నారు. నాగచైతన్య ఆర్మీ ఆఫీసర్‌ గా కనిపించబోతుండగా, వెంకటేష్‌ పల్లెటూరు వ్యక్తిగా కనిపించే అవకాశాలున్నాయి. జై లవకుశ దర్శకుడు బాబీ ఈ చిత్రంను తెరకెక్కిస్తున్నాడు. సురేష్‌ బాబు ఈ చిత్రం నిర్మాణ వ్యవహారాలు చూసుకుంటున్నాడు. వెంకీ ఎఫ్‌ 2, చైతూ మజిలీ చిత్రాల తర్వాత వీరిద్దరి కాంబోలో రాబోతున్న సినిమా అవ్వడం వల్ల భారీ బిజినెస్‌ అవ్వడం ఖాయంగా సినీ వర్గాల వారు అంటున్నారు.