అఫిసియల్: మలయాళ దర్శకుడితో వెంకీ 'దృశ్యం 2' రీమేక్..!

మలయాళ సూపర్‌ స్టార్‌ మోహన్‌ లాల్‌ కథానాయకుడిగా జీతూ జోసెఫ్‌ దర్శకత్వంలో తెరకెక్కిన సస్పెన్స్‌ థ్రిల్లర్‌ 'దృశ్యం' ప్రేక్షకులను విశేషంగా ఆకట్టుకుంది. ఈ సినిమా తెలుగు, తమిళ, హిందీ భాషల్లోనూ రీమేక్‌ అయి ఘన విజయం సాధించింది. తెలుగులో విక్టరీ వెంకటేష్ - మీనా ప్రధాన పాత్రలతో డైరెక్టర్ శ్రీప్రియ ఈ చిత్రాన్ని సక్సెస్ ఫుల్ గా రీమేక్ చేశారు.

అయితే ఇప్పుడు మలయాళ 'దృశ్యం' సినిమాకి సీక్వెల్‌ గా 'దృశ్యం 2' రూపొందింది. మొదటి భాగం కథ ఎక్కడ ముగిసిందో అక్కడే కథను మొదలుపెట్టి.. అదే నటీనటులు సాంకేతిక నిపుణులతో జీతూ జోసెఫ్‌ ఈ చిత్రాన్ని తెరకెక్కించాడు. ఈ సీక్వెల్ నిన్న శుక్రవారం ప్రముఖ ఓటీటీ అమెజాన్‌ ప్రైమ్ వేదికగా విడుదలైంది. పార్ట్-1కి మించిన థ్రిల్లింగ్ అంశాలతో ట్విస్టులతో రూపొందిన ఈ సినిమా పాజిటివ్ టాక్ తో మంచి వ్యూయర్ షిప్ తెచ్చుకుంటోంది. ఇప్పుడు ఈ సీక్వెల్‌ ని కూడా తెలుగులో రీమేక్‌ చేయనున్నారు.

'దృశ్యం'లో నటించిన వెంకటేశ్‌ ఈ సీక్వెల్‌ లోనూ చేసేందుకు పచ్చజెండా ఉపేశారు. మాతృకను డైరెక్ట్ చేసిన జీతూ జోసెఫ్‌ ఈ తెలుగు రీమేక్‌ ను తెరకెక్కించనున్నారు. మ‌రో నిర్మాణ సంస్థ‌తో క‌లిసి సురేష్ ప్రొడ‌క్ష‌న్స్ బ్యాన‌ర్‌ పై డి. సురేష్‌ బాబు ఈ చిత్రాన్ని నిర్మించ‌నున్నారు. ఇటీవలే వెంకటేష్ - సురేష్ బాబు మలయాళ దర్శక నిర్మాతలతో చర్చలు జరిపారు.

ఈ నేపథ్యంలో ఇప్పటికే దీనికి సంబంధించిన ప్రీ ప్రొడ‌క్ష‌న్ వర్క్స్ ప్రారంభించార‌ని తెలుస్తోంది. మార్చి 6 నుంచి ఈ మూవీ రెగ్యుల‌ర్ షూటింగ్ ప్రారంభం కానుంద‌ని సమాచారం. నిర్విరామంగా షూటింగ్ జరిపి వెంకటేష్ ప్రస్తుతం నటిస్తున్న 'ఎఫ్ 3' కంటే ముందే 'దృశ్యం 2' మూవీని థియేట‌ర్ల‌లో రిలీజ్ చేయాల‌ని మేక‌ర్స్ ప్లాన్ చేస్తున్నారని తెలుస్తోంది. ఈ రీమేక్ కి సంబంధించిన పూర్తి వివరాలు త్వరలోనే అధికారికంగా వెలువడనున్నాయి.