వెన్నెల కిషోర్.. అన్నగారి మేనేజర్!

నందమూరి బాలకృష్ణ - క్రిష్ కాంబినేషన్లో తెరకెక్కుతున్న ఎన్టీఆర్ బయోపిక్ ఇప్పటికే పలు ముఖ్యమైన పాత్రల క్యాస్టింగ్ విషయంలో ప్రేక్షకుల చేత ప్రశంసలు అందుకుంది. ఎన్టీఆర్ పాత్రధారి బాలయ్య నుండి మొదలు పెడితే.. ప్రతి ఒక్కరూ ఆయా పాత్రలకు చక్కగా సూటయ్యారు. తాజా సమాచారం ప్రకారం ఈ సినిమాలోని మరోపాత్రకు సంబంధించిన వివరాలు బయటకు వచ్చాయి.

ఎన్టీఆర్ కు మేనేజర్ గా పని చేసిన రుక్మనాథరావు పాత్రకు స్టార్ కమెడియన్ వెన్నెల కిషోర్ ను తీసుకున్నారట. బసవతారకంగారికి స్వయానా సోదరుడైన రుక్మనాథరావును ఎన్టీఆర్ ఎంతో నమ్మేవారట. ఆయనతో మంచి అనుబంధం ఉండేదట. అందుకే వారిద్దరి మధ్య జరిగే కొన్ని ముఖ్యమైన సీన్స్ సినిమాలో చూపేందుకు క్రిష్ రెడీ అవుతున్నాడట. ఏదేమైనా ఇలాంటి క్రేజీ ప్రాజెక్టులో వెన్నెల కిషోర్ భాగం కావడం అభిమానులకు అనందాన్నిచ్చేదే. బాలయ్య - వెన్నెల కిషోర్ కాంబినేషన్ సీన్స్ తప్పకుండా ప్రేక్షకులను అలరించడం ఖాయం.

ఎన్టీఆర్ బయోపిక్ 'కథానాయకుడు'.. 'మహానాయకుడు' అనే రెండు భాగాలుగా విడుదల చేస్తున్నారన్న సంగతి తెలిసిందే. మొదటి భాగం జనవరి 9 న రిలీజ్ చేసేందుకు సన్నాహాలు చేస్తున్నారు. రెండో భాగం 'మహానాయకుడు' ఫిబ్రవరి మొదటి వారంలో ప్రేక్షకుల ముందుకు తీసుకొస్తారట. ఇదిలా ఉంటె వెన్నెల కిషోర్ ఈ సినిమాతో పాటుగా శంకర్ నెక్స్ట్ ఫిలిం 'భారతీయుడు 2' లో కూడా ఒక కీలక పాత్ర దక్కింది. ఈ సినిమాతో వెన్నెల కిషోర్ కోలీవుడ్ ఎంట్రీ ఇస్తున్నాడు.