'ఐకాన్ - కనబడుటలేదు' ప్రాజెక్ట్ పై వేణు శ్రీరామ్ స్పందన..!

'ఓ మై ఫ్రెండ్' సినిమాతో దర్శకుడిగా పరిచయమైన వేణు శ్రీరామ్.. 'ఎంసీఏ' సినిమాతో సక్సెస్ అందుకున్నాడు. ఈ క్రమంలో మూడో సినిమాని పవర్ స్టార్ పవన్ కళ్యాణ్ తో చేసే అవకాశం దక్కించుకుని టాక్ ఆఫ్ ది ఇండస్ట్రీగా మారిపోయాడు. అయితే నిజానికి పవన్ తో 'వకీల్ సాబ్' స్టార్ట్ చేయడం కంటే ముందే, అల్లు అర్జున్ తో ''ఐకాన్ - కనబడుటలేదు'' అనే మూవీ అనౌన్స్ చేసాడు వేణు శ్రీరామ్. శ్రీ వెంకటేశ్వర క్రియేషన్స్ బ్యానర్ పై దిల్ రాజు ఈ చిత్రాన్ని నిర్మిస్తున్నట్లు వెల్లడించారు. అయితే బన్నీ దీనిని పక్కన పెట్టి 'అల వైకుంఠపురంలో' సినిమాని పూర్తి చేయడంతో పాటు సుకుమార్ తో 'పుష్ప' మూవీని పట్టాలెక్కించాడు. దీంతో 'ఐకాన్' ప్రాజెక్ట్ అటకెక్కినట్లే అని కామెంట్స్ వచ్చాయి.

అయితే గతేడాది అల్లు అర్జున్ పుట్టిన రోజు సందర్భంగా 'ఐకాన్' పోస్టర్ తో శుభాకాంక్షలు తెలియజేసి ఈ సినిమా సంజీవంగానే ఉన్నట్లు చెప్పకనే చెప్పారు. దాని తర్వాత మళ్ళీ మరో అప్డేట్ లేదు. ఇక శ్రీరామ్ వేణు దిల్ రాజు బ్యానర్ లో 'వకీల్ సాబ్' సినిమా చేసుకుంటూ వెళ్ళిపోయాడు. అయితే 'వకీల్ సాబ్' ప్రమోషన్స్ లో భాగంగా పలు ఇంటర్వ్యూలలో పాల్గొంటున్న ఈ డైరెక్టర్.. 'ఐకాన్' ప్రాజెక్ట్ గురించి స్పందించారు. ''ఆ ప్రాజెక్ట్ గురించి టైం వచ్చినప్పుడు మాట్లాడతాను. పాస్ట్ ఈజ్ పాస్ట్. నేను ఇండస్ట్రీలోకి వచ్చి ఇన్నేళ్ల నుంచి సినిమా తీయడానికి ట్రై చేస్తూ ఉన్నాను కాబట్టే ఇక్కడ ఉన్నాను. ఏది జరిగినా మూవ్ ఆన్ అవ్వాలి'' అని శ్రీరామ్ తెలిపారు. అలానే 'వకీల్ సాబ్' విడుదలైన తర్వాతే తన నెక్స్ట్ ప్రాజెక్ట్ గురించి ఆలోచిస్తానని చెప్పుకొచ్చారు. వేణు శ్రీరామ్ మాటలను బట్టి చూస్తే 'ఐకాన్' ప్రాజెక్ట్ ని పూర్తిగా పక్కన పెట్టినట్లే అనిపిస్తోంది. ఇక అల్లు అర్జున్ కూడా 'పుష్ప' తర్వాత కొరటాల శివ దర్శకత్వంలో ఓ పాన్ ఇండియా ప్రాజెక్ట్ అనౌన్స్ చేసాడు. 'వకీల్ సాబ్' రిజల్ట్ తర్వాత అయినా 'ఐకాన్' సినిమా మళ్ళీ చర్చకు వస్తుందేమో చూడాలి.