బన్నీ ఇంకా ఆ సినిమాను హోల్డ్‌ లోనే ఉంచాడట

అల్లు అర్జున్ నా పేరు సూర్య సినిమా తర్వాత దాదాపుగా ఏడాది పాటు గ్యాప్ తీసుకున్నాడు. ఆ సమయంలో బ్యాక్ టు బ్యాక్ మూడు సినిమాలను కమిట్ అయ్యాడు. అందులో ఒకటి దిల్‌ రాజు బ్యానర్‌ లో వేణు శ్రీరామ్ దర్శకత్వంలో సినిమా కూడా ఉంది. ఐకాన్ అనే టైటిల్‌ తో సినిమా ను ప్రకటించారు. కాని ఆ సినిమా తర్వాత ప్రకటించిన అల వైకుంఠపురంలో మరియు పుష్ప రెండు సినిమాలు కూడా చేశాడు. ఇప్పటికి ఐకాన్ విషయంను ఎటూ తేల్చడం లేదు. బన్నీ టైమ్‌ తీసుకుంటున్న నేపథ్యంలో వకీల్ సాబ్ సినిమాతో వేణు శ్రీరామ్ బిజీ అయ్యాడు. పుష్ప తర్వాత అయినా బన్నీ 'ఐకాన్‌' కు ఓకే చెప్తాడేమో అనుకుంటే కొరటాల శివ దర్శకత్వంలో సినిమాను చేయబోతున్నట్లుగా ఇప్పటికే ప్రకటన వచ్చింది.

ఐకాన్ సినిమా గురించి జనాలు మర్చి పోతున్నారు. ఇలాంటి సమయంలో దర్శకుడు వేణు శ్రీమ్‌ మరోసారి ఆ సినిమా గురించి స్పందించాడు. వకీల్ సాబ్‌ ప్రమోషన్ లో భాగంగా దర్శకుడు వేణు శ్రీరామ్‌ మాట్లాడుతూ బన్నీతో ఐకాన్ సినిమా చేయాల్సి ఉంది. ప్రస్తుతానికి బన్నీ వేరే ప్రాజెక్ట్‌ లతో బిజీగా ఉన్న కారణంగా ఆలస్యం అవుతుందని చెప్పుకొచ్చాడు. ఆలస్యం అవుతుందే తప్ప ఐకాన్ ను పూర్తిగా వదిలేయలేదని దర్శకుడు వేణు శ్రీరామ్ క్లారిటీ ఇచ్చాడు. బన్నీ ఇంకా ఎంత కాలం ఐకాన్‌ ను హోల్డ్‌ లో ఉంచుతాడో చూడాలి. వకీల్ సాబ్ సక్సెస్‌ అయితే బన్నీ తప్పకుండా వచ్చే ఏడాదిలో ఐకాన్‌ చేసే అవకాశాలు ఉన్నాయంటున్నారు.