వర్సటైల్ హీరో సొంత గొంతుతోనే బాలీవుడ్ ఎంట్రీ..!

వర్సటైల్ హీరో అడివి శేష్ ప్రధాన పాత్రలో తెరకెక్కుతున్న ప్రతిష్టాత్మక చిత్రం ''మేజర్''. 26/11 ముంబై ఉగ్రవాద దాడులలో వీరమరణం పొందిన మేజర్ సందీప్ ఉన్నికృష్ణన్ స్ఫూర్తిదాయకమైన జీవితం ఆధారంగా ఈ సినిమా తెరకెక్కుతోంది. ఇప్పటికే షూటింగ్ మొత్తం పూర్తి చేసుకున్న ఈ చిత్రం ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోంది.

''మేజర్'' చిత్రాన్ని 2022 ఫిబ్రవరి 11న ప్రపంచ వ్యాప్తంగా విడుదల చేయనున్నారు. తెలుగుతో పాటుగా హిందీ, మలయాళ భాషల్లో రూపొందుతున్న ఈ సినిమాకు సంబంధించిన ప్రమోషన్లు జోరుగా సాగుతున్నాయి. 2021 ఏడాది చివరి రోజున హిందీ వర్షన్ డబ్బింగ్ ప్రారంభించారు అడివి శేష్. ఈ విషయాన్ని సోషల్ మీడియా వేదికగా వెల్లడిస్తూ డబ్బింగ్ స్టూడియోలోని వీడియో షేర్ చేశారు.

శేష్ కెరీర్ లో ఫస్ట్ పాన్ ఇండియా మూవీగా తెరకెక్కుతున్న 'మేజర్' కోసం ఇతర భాషల్లో కూడా సొంత డబ్బింగ్ చెప్పుకుంటున్నారు. 'గూఢచారి' ఫేమ్ శశి కిరణ్ తిక్కా ఈ చిత్రానికి దర్శకత్వం వహిస్తున్నారు. అడవి శేష్ కథ - స్క్రీన్ ప్లే సమకూర్చారు. ఇందులో తెలుగమ్మాయి శోభితా దూళిపాళ్ల - బాలీవుడ్ బ్యూటీ సైఈ మంజ్రేకర్ - ప్రకాష్ రాజ్ - రేవతి - మురళీ శర్మ కీలక పాత్రలు పోషిస్తున్నారు.

మేజర్ సందీప్ ఉన్నికృష్ణన్ బాల్యం - యవ్వనం - సైన్యంలో చేరిన‌ అద్భుతమైన క్ష‌ణాల నుండి ముంబై దాడి సంఘటనలో అమరుడయ్యే వరకు.. అతని స్ఫూర్తిదాయకమైన జీవితంలోని విభిన్న కోణాలను ‘మేజ‌ర్’ చిత్రంలో చూపించబోతున్నారు. ఇప్పటికే విడుదలైన ప్రచార చిత్రాలు - టీజర్ మంచి స్పందన తెచ్చుకున్నాయి.

'మేజర్' చిత్రాన్ని మహేష్ బాబు జీఎంబీ ఎంటర్‌టైన్‌మెంట్ మరియు A+S మూవీస్‌ తో కలిసి సోనీ పిక్చర్స్ ఫిల్మ్స్ ఇండియా నిర్మిస్తోంది. శ్రీ చరణ్ పాకాల ఈ చిత్రానికి సంగీతం సమకూరుస్తుండగా.. వంశీ పచ్చిపులుసు సినిమాటోగ్రఫీ అందిస్తున్నారు. అబ్బూరి రవి ఈ సినిమాకు డైలాగ్స్ అందిస్తున్నారు.