మెగా 'గాడ్ ఫాదర్' లో వర్సటైల్ హీరో..!

మెగాస్టార్ చిరంజీవి ప్రధాన పాత్రలో నటిస్తున్న లేటెస్ట్ మూవీ ''గాడ్ ఫాదర్''. మోహన్ రాజా దర్శకత్వంలో తెరకెక్కుతున్న ఈ సినిమా షూటింగ్ చివరి దశలో ఉంది. చిరు కెరీర్ లో రాబోతున్న ఈ153వ చిత్రానికి చాలా ప్రత్యేకతలు ఉన్నాయి.

ఇందులో కండల వీరుడు సల్మాన్ ఖాన్ కీలక పాత్ర పోషిస్తున్నారు. ఇది బాలీవుడ్ సూపర్ స్టార్ కు టాలీవుడ్ డెబ్యూ. అలానే ఈ సినిమాలో స్టార్ హీరోయిన్ నయనతార కీలక పాత్రలో నటిస్తుండగా.. డైరెక్టర్ పూరీ జగన్నాధ్ అతిధి పాత్రలో కనిపించనున్నారు.

'గాడ్ ఫాదర్' సినిమాలో వర్సటైల్ యాక్టర్ సత్యదేవ్ కీలకమైన పాత్రలో నటించనున్నారు. ఈ విషయాన్ని చిరంజీవి సోషల్ మీడియా ద్వారా వెల్లడించారు. 'ఆచార్య' చిత్రంలో తన అభిమాన హీరో మెగాస్టార్ తో స్క్రీన్ స్పేస్ పంచుకోవడం పట్ల సంతోషం వ్యక్తం చేస్తూ సత్య దేవ్ ట్వీట్ చేశారు.

''అన్నయ్యా.. నటనలో జీవితంలో అందరికో ఆచార్య మీరు. అభిమానిగా గుండెల్లో చిరకాలం తలిచేది మీ పేరు. మిమ్మల్ని చూస్తే నటుడిగా మారాను. ఈరోజు ఆచార్య సినిమాలో కాసేపైనా మీతోపాటూ కనిపించే అదృష్టం కలిగింది. మీ కష్టం, క్రమశిక్షణ దగ్గర నుంచి చూసి నేర్చుకునే అవకాశం దక్కింది.'' అని సత్యదేవ్ పేర్కొన్నారు.

దీనికి చిరంజీవి స్పందిస్తూ.. "డియర్ సత్యదేవ్.. థాంక్యూ. నీలాంటి చక్కని నటుడు నా అభిమాని కావడం చాలా సంతోషం.. 'ఆచార్య' లో తక్కువ నిడివి పాత్రలో అయినా నువ్వు కనిపించడం నాకు ఆనందం.. 'గాడ్ ఫాదర్' సినిమాలో నా అభిమాని నాకు ఎదురు నిలబడే స్థాయి పాత్రలో నటించడం నాకు గర్వకారణం. నిన్ను చూస్తుంటే నాకు చాలా గర్వంగా ఉంది. గాడ్ బ్లెస్!" అని ట్వీట్ చేశారు.

ఈ సందర్భంగా షేర్ చేసిన ఫోటోలో సత్య దేవ్ తో చిరంజీవి కరచాలనం చేస్తున్నారు. ఇప్పటికే సెట్స్ నుంచి బయటకు వచ్చిన ఫోటోలను బట్టి సత్యదేవ్ 'గాడ్ ఫాదర్' సినిమాలో భాగం అవుతున్నారని అర్థం అయింది. అయితే ఇప్పుడు చిరంజీవి స్వయంగా ఈ విషయాన్ని తెలియజేశారు.

మలయాళ బ్లాక్ బస్టర్ 'లూసిఫర్‌' చిత్రానికి అధికారిక రీమేక్‌ గా.. హై ఇంటెన్స్ పొలిటికల్ యాక్షన్ థ్రిల్లర్ గా ''గాడ్‌ ఫాదర్‌'' సినిమా తెరకెక్కుతోంది. స్టార్ క్యాస్టింగ్ తో పాటుగా టాప్ టెక్నిషియన్స్ ఈ సినిమాకు వర్క్ చేస్తున్నారు.

మాస్టర్ సినిమాటోగ్రాఫర్ నీరవ్ షా కెమెరాను హ్యాండిల్ చేస్తుండగా.. సెన్సేషనల్ మ్యూజిక్ డైరెక్టర్ ఎస్ఎస్ థమన్ సంగీతం సమకూరుస్తున్నారు. సురేష్ సెల్వరాజన్ ఆర్ట్ డైరెక్టర్ గా వ్యవహరిస్తున్నారు.

కొణిదెల ప్రొడక్షన్ కంపెనీ మరియు సూపర్ గుడ్ ఫిలింస్ సంస్థలు కలిసి ఈ సినిమాని రూపొందిస్తున్నాయి. కొణిదెల సురేఖ సమర్పణలో ఆర్బీ చౌదరి మరియు ఎన్వీ ప్రసాద్ సంయుక్తంగా ఈ చిత్రాన్ని నిర్మిస్తున్నారు.