విక్టరీ వెంకటేష్ సచిన్ స్టయిల్లో..

మాస్టర్ బ్లాస్టర్ సచిన్ టెండూల్కర్ ఇటీవలే ముంబయిలో అర్ధరాత్రి సమయంలో కార్లో ప్రయాణిస్తూ.. రోడ్డు మీద క్రికెట్ ఆడుతున్న వాళ్లను చూసి ఆగడం.. కారు దిగి వాళ్లతో కలిసి కాసేపు క్రికెట్ ఆడి అలరించడం.. వాళ్లతో సెల్ఫీలు కూడా దిగడం అందరినీ ఆకట్టుకున్న సంగతి తెలిసిందే. సచిన్ నుంచి స్ఫూర్తి పొందాడో ఏమో టాలీవుడ్ సీనియర్ హీరో వెంకటేష్ కూడా ఇలాగే చేశాడు. కాకపోతే ఆయన ఆడింది క్రికెట్ కాదు.. బ్యాడ్మింటన్.

హైదరాబాద్ సిటీలో ఓ రోడ్డుపై ప్రయాణిస్తుండగా.. కొందరు పిల్లలు కలిసి షటిల్ ఆడటం గమనించాడు వెంకీ. తాను కూడా సచిన్ లాగా చేద్దామనిపించిందో ఏమో.. వెంటనే కారు దిగి వాళ్ల దగ్గరికి వెళ్లాడు. రాకెట్ తీసుకుని వాళ్లతో కాసేపు షటిల్ ఆడాడు. వెంకీ స్థాయి హీరో ఇలా తమతో ఆడటంతో వాళ్ల ఆనందానికి అవధుల్లేకపోయాయి. కొందరు ఆయనతో ఆడితే కొందరు ఫొటోలు.. వీడియోలు తీసుకున్నాయి. ఒక అమ్మాయిని దగ్గరికి తీసుకుని ప్రేమగా మాట్లాడి.. ఆ తర్వాత కారు ఎక్కి వెళ్లిపోయాడు వెంకీ.

మామూలుగానే విక్టరీ హీరో చాలా సింపుల్ గా ఉంటాడు. క్రికెట్ ప్రియుడైన వెంకీ హైదరాబాద్ లో ఇంటర్నేషనల్ మ్యాచ్ జరిగినా.. ఐపీఎల్ మ్యాచ్ జరిగినా అక్కడ ప్రత్యక్షం అయిపోతాడు. సాధారణ అభిమానిలాగే కనిపిస్తాడు. వాళ్లతో కలిసిపోయి మన జట్టుకు మద్దతుగా నినాదాలు చేస్తాడు. కేరింతలు కొడతాడు. అక్కడ వెంకీ చూపించే సింప్లిసిటీ అందరినీ ఆకట్టుకుంటుంది. ఇప్పుడు రోడ్డు మీద షటిల్ ఆడి తన ప్రత్యేకతను మరోసారి చాటుకున్నాడు వెంకీ.

వీడియో కోసం క్లిక్ చేయండి