హాలీవుడ్ దర్శకుడితో ఎన్టీఆర్ విలన్

విద్యుత్ జమాల్ గుర్తున్నాడా? జూనియర్ ఎన్టీఆర్ సినిమాలు‘శక్తి’.. ‘ఊసరవెల్లి’ల్లో విలన్ పాత్రల్లో నటించాడు. ఆ సినిమాలు ఆడకపోవడంతో తెలుగులో అనుకున్నంత బిజీ కాలేకపోయాడు. ఐతే తమిళంలో విజయ్-మురుగదాస్ సినిమా ‘తుపాకి’ అతడికి తిరుగులేని పేరు తెచ్చిపెట్టింది. మరోవైపు హిందీలో అతను హీరోగా మంచి గుర్తింపే తెచ్చుకున్నాడు. ‘కమాండో’.. ‘కమాండో-2’ సినిమాలు మంచి వసూళ్లతో విద్యుత్ కు మార్కెట్ తీసుకొచ్చాయి. గత ఏడాది ‘బాద్షాహో’ లాంటి భారీ సినిమాలోనూ నటించాడు విద్యుత్. ఇప్పుడతను ఓ హాలీవుడ్ దర్శకుడితో సినిమా చేస్తుడటం విశేషం. ఆ సినిమా పేరు.. జుంగ్లీ. చార్లెస్ రసెల్ అనే సీనియర్ హాలీవుడ్ దర్శకుడు ఈ చిత్రాన్ని తెరకెక్కిస్తుండటం విశేషం.

జుంగ్లీ పిక్చర్స్ సంస్థపై వినీత్ జైన్ ఈ చిత్రాన్ని నిర్మిస్తున్నాడు. హిందీ.. ఇంగ్లిష్ భాషల్లో ఈ చిత్రం తెరకెక్కుతోంది. దీన్ని ప్రపంచ స్థాయిలో పెద్ద ఎత్తున విడుదల చేయడానికి సన్నాహాలు చేస్తున్నారు. ఇందులో విద్యుత్ టార్జాన్ తరహా పాత్ర చేస్తుండటం విశేషం. అటవీ నేపథ్యంలో సాగే సినిమా ఇది. ‘కమాండో’లో యాక్షన్ సన్నివేశాల్లో అద్భుత ప్రతిభ చూపించడం ద్వారా విద్యుత్ ఈ సినిమాకు ఎంపికయ్యాడు. అతడి కెరీర్లో ఇది బిగెస్ట్ మూవీ. ముందు ఈ దసరాకు ఈ చిత్రాన్ని రిలీజ్ చేయాలనుకున్నారు. తర్వాత వచ్చే ఏడాది వేసవికి వాయిదా వేశారు. 2019 ఏప్రిల్ 5న ‘జుంగ్లీ’ రిలీజవుతుందని తాజాగా ప్రకటించారు. ఇది కాకుండా బాలీవుడ్లో హీరోగా విద్యుత్ రెండు మూడు సినిమాల్లో నటిస్తున్నాడు. బాలీవుడ్లో బిజీగా ఉండటంతో దక్షిణాది ఆఫర్లను అతను ఒప్పుకోవడం లేదు.