విజయ్ ఆంటోనీ.. మరో మంచి ట్రైలర్

సినిమాల సంగతెలా ఉన్నా.. మంచి టీజర్.. ట్రైలర్లతో వస్తుంటాడు తమిళ నటుడు విజయ్ ఆంటోనీ. ‘బిచ్చగాడు’తో తెలుగుతో మంచి మార్కెట్ సంపాదించుకున్న విజయ్.. ఆ తర్వాత ‘బిచ్చగాడు’.. ‘యమన్’ సినిమాలతో పలకరించాడు. ఈ రెండు సినిమాల ట్రైలర్లు జనాల్లో బాగానే ఆసక్తి రేకెత్తించాయి. కానీ ఆ ట్రైలర్లకు తగ్గట్లుగా సినిమాలు లేకపోయాయి. దీంతో ఆ రెండు సినిమాలూ ఫ్లాపయ్యాయి.

ఐతే ఇప్పుడు విజయ్ మరో మంచి ట్రైలర్ తో వచ్చాడు. ఆ మధ్య మెగాస్టార్ చేతుల మీదుగా విజయ్ కొత్త సినిమా ‘ఇంద్రసేన’ ఫస్ట్ లుక్ లాంచ్ అయిన సంగతి తెలిసిందే. ఇప్పుడు దీని ట్రైలర్ వచ్చింది. నమ్మకద్రోహం.. మోసం వల్ల దారుణంగా దెబ్బ తిన్న ఓ వ్యక్తి.. తిరిగి పుంజుకుని జీవితంలో ఎలా విజయం సాధించాడనే కథాంశంతో ఈ చిత్రం తెరకెక్కింది.

రౌడీయిజం.. రాజకీయాలు ముడిపడ్డ సినిమాలా కనిపిస్తోంది ట్రైలర్ చూస్తుంటే. ట్రైలర్ కాన్సెప్ట్.. డైలాగులు బాగున్నాయి. సినిమాలోని ఇంటెన్సిటీ ట్రైలర్లో కనిపిస్తోంది. విజయ్ ఆంటోనీకి డబ్బింగ్ కూడా బాగుంది. విజయ్ ఆంటోనీ గత సినిమాల్లాగే ఇది కూడా సీరియస్ గా సాగేలా ఉంది. ఈ చిత్రాన్ని రాధికా శరత్ కుమార్ తో కలిసి విజయే నిర్మించాడు. జి.శ్రీనివాసన్ దర్శకుడు. మరి ఈసారైనా కేవలం ట్రైలర్ తోనే కాక సినిమాతోనూ విజయ్ ఆకట్టుకుంటాడేమో చూద్దాం.