మహేష్ సినిమాలో ఆ సూపర్ స్టార్?

మహేష్ బాబు మనకు సూపర్ స్టారే. కానీ పొరుగు భాషల్లో అతను అంత పాపులరేమీ కాదు. తమిళ ప్రేక్షకుల్లో అతడికి పెద్దగా క్రేజ్ ఏమీ లేదు. ‘శ్రీమంతుడు’ తమిళ వెర్షన్ ‘సెల్వందన్’ కూడా అక్కడేమీ పెద్దగా ఆడలేదు. ఐతే మురుగదాస్ మాత్రం మహేష్ బాబుతో చేయబోయే సినిమాను తమిళంలో కూడా పెద్ద లెవెల్లో రిలీజ్ చేయించాలని చూస్తున్నాడు. ఈ సినిమా బడ్జెట్ దాదాపు వంద కోట్లని అంటున్నారు. ఆ మొత్తం వర్కవుట్ కావాలంటే తమిళంలో కూడా ఈ సినిమా బాగానే ఇంపాక్ట్ చూపించాలి. ఐతే కేవలం మురుగదాస్ పేరు చూసి జనాలకు థియేటర్లకు వచ్చేయరు కదా. తమిళ ఆడియన్స్ ను ఆకర్షించే ఇంకేదైనా ప్రత్యేకత ఆ సినిమాలో ఉండి తీరాలి.

ఆ ప్రత్యేకత కోసమే తన మిత్రుడు.. సూపర్ స్టార్ విజయ్ ను సాయం కోరుతున్నాడట మురుగదాస్. ఈ సినిమాలో ఓ అతిథి పాత్ర చేయమని మురుగదాస్ అడగ్గా విజయ్ ఓకే అన్నట్లుగా కోలీవుడ్ వర్గాల్లో చర్చ నడుస్తోంది. విజయ్ కెరీర్లో అతి పెద్ద హిట్లయిన తుపాకి, కత్తి సినిమాల్ని తీసింది మురుగదాసే అన్న సంగతి తెలిసిందే. ఆ కృతజ్నతతోనే మహేష్-మురుగ కాంబినేషన్ లో రాబోయే సినిమాలో క్యామియో రోల్ చేయడానికి విజయ్ అంగీకరించాడట. ఇదే నిజమైతే ఇక తమిళ వెర్షన్ బిజినెస్ విషయంలో ఇబ్బందులేమీ ఉండవు. భారీ స్థాయిలో ఓ తమిళ సినిమాను రిలీజ్ చేసినట్లే చేసుకోవచ్చు. ఈ చిత్రం మే నెలలో సెట్స్ మీదికి వెళ్తుందని సమాచారం. దీపావళికి విడుదల చేయాలన్నది ప్లాన్.