దిల్ రాజుపై విజ‌య్ న‌వ్వుతూనే పంచ్ వేశాడే..?

త‌మిళ స్టార్ హీరో ద‌ళ‌ప‌తి విజ‌య్ హీరోగా తెర‌కెక్కుతున్న త‌మిళ యాక్ష‌న్ డ్రామా `వారీసు`. వంశీ పైడిప‌ల్లి ద‌ర్శ‌క‌త్వం వ‌హిస్తున్నారు. తొలి సారి ఈ మూవీతో టాలీవుడ్ స్టార్ ప్రొడ్యూస‌ర్ దిల్ రాజు కోలీవుడ్ లోకి ఎంట్రీ ఇస్తున్నారు. ర‌ష్మిక మంద‌న్న హీరోయిన్ గా న‌టిస్తున్న ఈ మూవీని తెలుగులో `వార‌సుడు`గా రిలీజ్ చేస్తున్న విష‌యం తెలిసిందే. త‌మిళ‌, తెలుగు భాష‌ల్లో పొంగ‌ల్ సంద‌ర్భంగా ఈ మూవీని దిల్ రాజు భారీ స్థాయిలో రిలీజ్ చేయ‌బోతున్నారు.

ఇప్ప‌టికే థియేట‌ర్ల వివాదంతో పాటు దిల్ రాజు చేసిన వ్యాఖ్య‌ల కార‌ణంగా ఈ మూవీ త‌మిళ‌, తెలుగు భాష‌ల్లో హాట్ టాపిక్ గా మారింది. అంతే కాకుండా త‌మిళ‌నాట విజ‌య్ నెంబ‌ర్ వ‌న్ స్టార్ అంటూ దిల్ రాజు ఇటీవ‌ల చేసిన వ్యాఖ్య‌లు త‌మిళ‌నాట పెద్ద దుమారాన్ని సృష్టిస్తున్నాయి. ఈ వ్యాఖ్య‌ల‌పై సీరియ‌స్ అవుతున్న అజిత్ ఫ్యాన్స్ `వారీసు`తో పాటు దిల్ రాజుని నెట్టింట ట్రోల్ చేస్తున్నారు. ఇదిలా వుంటే తెలుగు, త‌మిళ భాష‌ల్లో `వారీసు` జ‌న‌వ‌రి 12న భారీ స్థాయిలో రిలీజ్ కి రెడీ అయిపోతోంది.

ఇప్ప‌టికే లిరిక‌ల్ వీడియోల‌తో ప్ర‌మోష‌న్స్ ని హోరెత్తిస్తున్న దిల్ రాజు ఈ మూవీ ఆడియో రిలీజ్ ఫంక్ష‌న్ ని డిసెంబ‌ర్ 24న చెన్నైలో భారీ స్థాయిలో నిర్వ‌హించారు. ఈ కార్య‌క్ర‌మంలో హీరో విజ‌య్ సెంట‌రాఫ్ ఎట్రాక్ష‌న్ గా నిలిచారు. రెడ్ కార్పెట్ పై విజ‌య్ న‌డుచుకుంటూ వ‌స్తుండ‌గా ఫ్యాన్స్ ఫోన్ లైట్ ల‌తో చేసిన ర‌చ్చ అంతా ఇంతా కాదు. దీనికి సంబంధించిన ప‌లు వీడియోలు ప్ర‌స్తుతం నెట్టింట వైర‌ల్ గా మారాయి. ఫ్యాన్స్ తో క‌లిసి ఓ సెల్పీ వీడియోని పంచుకున్నారు విజ‌య్‌.

ఈ ఈవెంట్ లో విజ‌య్ మాట్లాడిన తీరు ప్ర‌ధాన హైలైట్ గా నిలిచింది. వివేక‌నందుని మాట‌ల‌తో ప్ర‌సంగాన్ని మొద‌లు పెట్టిన విజ‌య్ త‌న‌దైన స్టైల్లో ఫ్యాన్స్ ని హుషారెత్తించాడు. వేదిక‌పై `రంజిత‌మే` అంటూ సాగే పాట‌ని పాడి ఫ్యాన్స్ ని ఖుషీ చేశాడు. `తునీవు`తో పోటీ గురించి ప‌రోక్షంగా స్పందించిన విజ‌య్ నాతో నాకే పోటీ అంటూ క్లారిటీ ఇచ్చాడు. ఈ సంద‌ర్భంగా దిల్ రాజుపై స‌ర‌దా కామెంట్ లు చేయ‌డం విశేషం. దిల్ రాజు ఇంటికి ఇటీవ‌లే వార‌సుడు వ‌చ్చాడ‌న్నారు.

ఆ త‌రువాత స‌ర‌దాగా న‌వ్వుతూ `వార‌సుడు 2` ఎప్పుడు సార్? అని చ‌మ‌త్క‌రించాడు. దీంతో ఆడిటోరియం మొత్తం న‌వ్వులు విరిశాయి. వెంట‌నే తాను `వార‌సుడు` సీక్వెల్ గురించి అడిగాన‌ని క్లారిటీ ఇచ్చాడు విజ‌య్‌. ఇందుకు సంబంధించిన వీడియో ప్ర‌స్తుతం నెట్టింట వైర‌ల్ గా మారింది. పూర్తి ఆడియో ఫంక్ష‌న్ త్వ‌ర‌లో టెలీకాస్ట్ కానుంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.