సీక్రెట్ టాస్క్ లో అద‌ర‌గొట్టిన దీప్తి సున‌యిన‌

ఈ వారం ఎవ‌రు ఎలిమినేట్ అవుతార‌న్న విష‌యాన్ని ఆదివారం రాత్రి టెలికాస్ట్ అయ్యే బిగ్ బాస్ చూడాల్సిన అవ‌స‌ర‌మే అక్క‌ర్లేదు. శ‌నివారం.. లేదంటే ఆదివారం ఉద‌యం సోష‌ల్ మీడియాలోకాసేపు యాక్టివ్ గా ఉంటే చాలు.. ఆ వివ‌రాలు బ‌య‌ట‌కు వ‌చ్చేసే ప‌రిస్థితి.

ఎప్ప‌టిలానే.. ఈ వారం సైతం దీప్తి సున‌యిన బిగ్ బాస్ నుంచి ఎలిమినేట్ అయ్యార‌న్న విష‌యం సోష‌ల్ మీడియాలో లీకైంది. దీంతో.. ఎలిమినేషన్ మీద ఎలాంట్ స‌స్పెన్స్ లేదు. ఇలాంటి వేళ కార్య‌క్ర‌మం చ‌ప్ప‌గా సాగుతుంద‌న్న టైంలో.. అనుకోనిరీతిలో గీతాగోవిందం ఫేం విజ‌య్ దేవ‌ర‌కొండ.. నానితో క‌లిసి దీప్తి చేసిన సీక్రెట్ టాస్క్ ఫ‌న్ ఫీస్ట్ గా మారింది.

సీక్రెట్ టాస్క్ పేరుతో దీప్తిని ఒక ఆట ఆడుకున్నారు విజ‌య్ దేవ‌ర‌కొండ‌.. నాని. సీక్రెట్ టాస్క్ లో భాగంగా తొలుత ఒక బ్లూ టూత్ ను దీప్తికి అంద‌జేశారు. అది పెట్టుకున్నంత‌నే ఆమెకు స‌ర్ ప్రైజ్ ఇస్తూ విజ‌య్ దేవ‌ర‌కొండ మాట్లాడేస‌రికి.. తీవ్ర‌మైన ఆనందానికి గురైంది దీప్తి. అత‌గాడికి ఐ ల‌వ్యూ చెప్పేసింది. దీనికి విజ‌య్ సైతం లవ్యూ టూ అని చెప్పాడు. ఇక‌.. టాస్క్ లో భాగంగా చెవికి పెట్టుకున్న బ్లూ టూత్ ఎవ‌రికి క‌నిపించ‌కుండా ఉండాల‌న్న సూచ‌న చేశారు.

దీనికి త‌గ్గ‌ట్లే త‌న జ‌ట్టుతో బ్లూటూత్ ను క‌వ‌ర్ చేసుకున్న దీప్తి.. విజ‌య్.. నానిలు చెప్పిన టాస్క్ ల‌ను ఒక్కొక్క‌టిగా చేసింది. ఈ సంద‌ర్భంగా భారీ ఫ‌న్ జ‌న‌రేట్ అయ్యింది. ఒక‌వేళ బ్లూటూత్ కానీ క‌ట్ అయితే.. బాత్రూంకి వ‌చ్చి కాల్ క‌నెక్ట్ చేసుకోవాల‌ని సూచించారు.

అలా మొద‌లైన సీక్రెట్ టాస్క్ ల‌లో.. త‌న సిస్ట‌ర్ మ్యారేజ్ అని చెప్పి ల‌డ్డూలు ఇవ్వాల‌ని చెప్ప‌టం.. కొంద‌రి మీద ల‌డ్డూలు విస‌ర‌మ‌ని చెప్పారు. ఆ త‌ర్వాత కాసేపు డిప్రెష‌న్ లోకి వెళ్లిన‌ట్లుగా న‌టించాల‌న్న మాట‌కు దీప్తి జీవించేసింది. ఆమె.. డిప్రెష‌న్ లోకి వెళ్లింద‌ని భావించిన త‌నీశ్‌.. రోల్ రైడా హ‌గ్ చేసుకోగా.. అంద‌రూ హ‌గ్ లు నీకు మాత్ర‌మే ఇస్తారా? అంద‌రికి ఇస్తారా? అంటూ విజ‌య్.. నానిలు చేసిన వ్యాఖ్య‌లు న‌వ్వు తెప్పించాయి. త‌నీశ్‌.. రోల్ రైడాల‌ను స్విమ్మింగ్ పూల్ లో తోసేయ‌టానికి దీప్తి చేసిన ప‌నులు న‌వ్వు తెప్పించాయి.

నిద్ర పోతున్న అమిత్ మీద నీళ్లు పోసి.. ఆ గ్లాస్ గ‌ణేశ్ చేతిలో పెట్ట‌మ‌న్న టాస్క్ కు జీవించేస్తూ.. ఏం గ‌ణేశ్ అమిత్ పై నీళ్లు ఎందుకు పోశావ్ అంటూ దీప్తి జీవించేయ‌టం.. అమిత్ సీరియ‌స్ కావ‌టం షో చూస్తున్న వారికి వినోదంగా మారింది. ఇలా.. చిలిపి ప‌నుల‌తో ఫుల్ మార్కులు కొట్టేసిన దీప్తికి.. చివ‌ర్లో షాకింగ్ గా ఆమే ఎలిమినేట్ అయిన‌ట్లు తేల‌టంతో నిరాశ‌కు గురైంది. సీక్రెట్ టాస్క్ ను రివీల్ చేస్తూ.. బిగ్ బాస్ హౌస్ లోని టీవీలో నాని.. విజ‌య్.. ద‌ర్శ‌కుడు ప‌రుశురామ్ క‌నిపించేస‌రికి ఇంటి స‌భ్యులు ఎగ్జైట్ అయ్యారు. మొత్తంగా.. సీక్రెట్ టాస్క్ కావాల్సినంత వినోదాన్ని పంచింద‌ని చెప్ప‌క త‌ప్ప‌దు.