అక్కినేనిగా అర్జున్ రెడ్డి?

లెజెండ‌రీ హీరోయిన్ సావిత్రి జీవిత చ‌రిత్ర ఆధారంగా 'మహానటి' తెర‌కెక్కుతోన్న‌ సంగ‌తి తెలిసిందే. ఈ ప్రెస్టీజియ‌స్ బ‌యోపిక్ కోసం న‌టీనటుల ఎంపికలో ద‌ర్శ‌కుడు నాగ్ అశ్విన్ సెల‌క్టివ్ గా ఉంటున్నాడు. సావిత్రి నిజ జీవితంలో కీల‌క‌మైన పాత్ర పోషించిన వారి పోలిక‌ల‌కు ద‌గ్గ‌ర‌గా ఉండే న‌టీ న‌టుల‌ను ఎంచుకుంటున్నాడు. మ‌హాన‌టిగా కీర్తి సురేష్ - ఆమె భర్త జెమినీ గణేశన్ పాత్రలో దుల్కర్ సల్మాన్ - ఎస్వీఆర్ పాత్రలో మోహన్ బాబు - చక్రపాణి పాత్రలో ప్రకాశ్ రాజ్ - కె.వి.రెడ్డి పాత్ర‌లో క్రిష్‌ - సింగీతం శ్రీ‌నివాసరావు పాత్ర‌లో త‌రుణ్ భాస్కర్ న‌టించ‌బోతున్నట్లు వార్త‌లు వ‌చ్చిన సంగ‌తి తెలిసిందే. ఆ చిత్రంలో అర్జున్ రెడ్డి జంట‌ విజ‌య్ దేవ‌ర‌కొండ - షాలినిలు కూడా న‌టిస్తున్నారని వార్త‌లు వ‌చ్చాయి. అయితే, విజ‌య్ ఏ పాత్ర‌లో న‌టిస్తున్నాడ‌న్న విష‌యంపై క్లారిటీ లేదు.

మ‌హాన‌టిలో కీల‌క‌మైన ఏఎన్నార్‌ - ఎన్టీఆర్ పాత్ర‌ల కోసం నాగ చైత‌న్య‌ - జూనియ‌ర్ ఎన్టీఆర్ ల‌ను నిర్మాత అశ్వినీద‌త్ సంప్ర‌దించిన సంగ‌తి తెలిసిందే. అయితే, కొన్ని కార‌ణాల వ‌ల్ల వారిద్ద‌రూ ఆ ప్ర‌తిపాద‌న‌ను తిర‌స్క‌రించారు. దీంతో, ఆ దిగ్గ‌జ నటులుగా ఎవ‌రు న‌టించ‌బోతున్నార‌న్న విష‌యంపై ఇప్ప‌టివ‌ర‌కు క్లారిటీ లేదు. అయితే, తాజాగా....లెజెండ‌రీ హీరో అక్కినేని నాగేశ్వ‌రారావు పాత్రను విజ‌య్ దేవ‌ర‌కొండ పోషించ‌బోతున్న‌ట్లు వార్తలు వ‌స్తున్నాయి. నాగ్ అశ్విన్‌ ద‌ర్శ‌క‌త్వం వ‌హించిన ఎవ‌డే సుబ్ర‌మ‌ణ్యం చిత్రంలో విజ‌య్ సెకండ్ లీడ్ రోల్ చేసిన సంగ‌తి తెలిసిందే. అప్ప‌టి నుంచి వారిద్ద‌రి మ‌ధ్య సాన్నిహిత్యం ఉంది. దీంతో, ఆ కీల‌క‌మైన రోల్ అర్జున్ రెడ్డిని వ‌రించింద‌ని తెలుస్తోంది. ఈ విష‌యంపై చిత్ర యూనిట్ నుంచి ఎటువంటి అధికారిక ప్ర‌క‌ట‌న వెలువ‌డ‌లేదు.