విజయ్ దేవరకొండ.. డియర్ కామ్రేడ్

‘అర్జున్ రెడ్డి’తో తిరుగులేని ఇమేజ్ సంపాదించిన కథానాయకుడు విజయ్ దేవరకొండ. ఆ సినిమాతో అతను రాత్రికి రాత్రే స్టార్ అయిపోయాడు. ఆల్రెడీ ‘పెళ్లిచూపులు’ సినిమాతో వచ్చిన గుర్తింపుతోనే అతడికి మంచి మంచి అవకాశాలు దక్కాయి. ఇక ‘అర్జున్ రెడ్డి’ తర్వాత పరిస్థితి చెప్పనవసరం లేదు. గీతా ఆర్ట్స్.. యువి క్రియేషన్స్.. వైజయంతీ మూవీస్ లాంటి పెద్ద బేనర్లు అతడితో ఒకటికి మించి సినిమాలు చేయడానికి ఒప్పందాలు కుదుర్చుకున్నాయి. అరడజనుకు పైగా కమిట్మెంట్లు ఇచ్చి ఒకదాని తర్వాత ఒకటి సినిమా పూర్తి చేయడానికి ప్లాన్ చేసుకున్నాడు విజయ్. అందులో ముందుగా పూర్తయిన ‘టాక్సీవాలా’ త్వరలోనే ప్రేక్షకుల ముందుకు రాబోతోంది. పరశురామ్ దర్శకత్వంలో చేస్తున్న సినిమా కూడా పూర్తి కావస్తోంది.

దాని తర్వాత విజయ్.. భరత్ కమ్మ అనే కొత్త దర్శకుడితో ఓ సినిమా చేయబోతున్నాడు. ‘పెళ్లిచూపులు’ నిర్మాతల్లో ఒకరైన యాష్ రంగినేని ఈ చిత్రాన్ని నిర్మిస్తున్నాడు. ఇంతకుముందే రిలీజైన ఈ చిత్ర ఫస్ట్ లుక్ లో విజయ్ వయొలెంట్ లుక్ లో కనిపించి ఆకట్టుకున్నాడు. ఈ చిత్రానికి ‘డియర్ కామ్రేడ్’ అనే టైటిల్ ఖరారు చేశారు. ఇప్పటిదాకా తన సినిమాల్లో చాలా వరకు హైదరాబాదీ-తెలంగాణ యాసలో మాట్లాడుతూ వచ్చిన విజయ్.. ఈ చిత్రంలో కాకినాడ యాసలో మాట్లాడబోతుండటం విశేషం. ఇందులో ఓ కొత్తమ్మాయి కథానాయికగా కనిపిస్తుంది. త్వరలోనే ఈ చిత్ర రెగ్యులర్ షూటింగ్ మొదలు కానుంది. ఇంకా నందిని రెడ్డి.. క్రాంతి కుమార్ ల దర్శకత్వంలోనూ విజయ్ నటించబోతున్నాడు. ఇవి కాక అతడికి ఇంకో రెండు కమిట్మెంట్లు ఉన్నాయి.