కరీంనగర్ టు ముంబై.. 'లైగర్‌' కథ ఇదే!

రౌడీ స్టార్ విజయ్‌ దేవరకొండ హీరోగా అనన్య పాండే హీరోయిన్ గా రూపొందిన పాన్ ఇండియా సినిమా లైగర్ ఈ వారంలో ప్రేక్షకుల ముందుకు రాబోతుంది. భారీ అంచనాల నడుమ రూపొందిన ఈ సినిమా ప్రమోషన్ కార్యక్రమాలు జోరుగా సాగుతున్నాయి. దర్శకుడు పూరి జగన్నాథ్ తాజాగా సినిమా యొక్క ఈవెంట్ లో మాట్లాడుతూ కథ ను రివీల్ చేశాడు.

ఈ సినిమా కథ కరీంనగర్‌ లో స్టార్ట్ అవుతుంది. కరీంనగర్ కు చెందిన బాలమణి(రమ్యకృష్ణ) తన కొడుకు (విజయ్‌) ని తీసుకుని ముంబయి చేరుకుంటుంది. అక్కడ తన కొడుకును అంతర్జాతీయ స్థాయి ఛాంపియన్ గా మార్చేందుకు చాలానే కష్టపడుతుంది. ఆ క్రమంలో హీరో మరియు అతడి తల్లి ఎదుర్కొన్న పరిణామాలు ఏంటీ అనేది ఈ సినిమా కథ గా పూరి పేర్కొన్నాడు.

విజయ్ దేవరకొండ ఈ సినిమా లో నత్తి ఉన్న వ్యక్తి పాత్రలో కనిపించబోతున్నారు. గతంలో విజయ్ దేవరకొండ ఎప్పుడు కూడా కనిపించని విభిన్నమైన రీతిలో ఈ సినిమాలో కనిపించబోతున్నాడు. ప్రస్తుతం సినిమాకు సంబంధించిన ప్రమోషన్ కార్యక్రమాల్లో భాగంగా విడుదల చేస్తున్న పోస్టర్ లు మరియు వీడియోలు సినిమా పై అంచనాలు మరింతగా పెంచుతున్నాయి.

సినిమా ట్రైలర్ విడుదల అయిన తర్వాత సాధారణంగా ఏ సినిమా కు అయినా కథ రివీల్‌ అవుతుంది. కాని ఇప్పటి వరకు కథ విషయంలో ఎలాంటి ఒక ఐడియా కూడా రాకుండా ట్రైలర్ ను రిలీజ్ చేశారు. అసలు సినిమా ఏంటి.. ఎలా ఉంటుంది అనే విషయం పై ఆసక్తికర చర్చ జరుగుతోంది. ఈ సమయంలో దర్శకుడు చెప్పిన స్టోరీ లైన్ సినిమా పై ఆసక్తి పెంచేలా ఉందంటూ కామెంట్స్ వస్తున్నాయి.