ఎన్టీఆర్ సినిమా ఎక్కడ..నాదెక్కడ-దేవరకొండ

ఈ నెల 11న ‘అరవింద సమేత’ రిలీజ్ కానున్న సంగతి తెలిసి కూడా ఆరు రోజుల ముందు ‘నోటా’ను రిలీజ్ చేస్తుండటంతో ఎన్టీఆర్ అభిమానులు విజయ్ దేవరకొండను లక్ష్యంగా చేసుకుని ట్రోల్ చేయడం చర్చనీయాంశమైన సంగతి తెలిసిందే. దీనిపై విజయ్ ఇప్పటికే ఒకసారి స్పందించాడు. తాజాగా ప్రముఖ క్రిటిక్ భరద్వాజ్ రంగన్ ఇంటర్వ్యూలోనూ ఈ విషయమై మాట్లాడాడు విజయ్. కొంచెం సుదీర్ఘంగానే అతను వివరణ ఇచ్చాడు. ఎన్టీఆర్ లాంటి పెద్ద హీరో సినిమా రాబోతుండగా.. ముందు వారం తన సినిమాను రిలీజ్ చేయడం వల్ల రిస్క్ తనకే అని.. నష్టం జరిగేది తన సినిమాకని విజయ్ అన్నాడు.

ఈ విషయంలో భయపడి వెనక్కి తగ్గాల్సింది తామే అన్నాడు. ఐతే మీ సినిమా రిలీజ్ చేయొద్దు అని ఎవరైనా తనను ఆదేశిస్తే మాత్రం తాను విననని.. అలా అనే హక్కు ఎవరికీ లేదని విజయ్ స్పష్టం చేశాడు. ఎన్టీఆర్ సినిమాకు.. తన సినిమాకు అంతరం చాలా ఉందని.. తన సినిమా బడ్జెట్.. బిజినెస్ తో పోలిస్తే ఎన్టీఆర్ సినిమా పది రెట్ల స్థాయిలో ఉంటుందని.. అలాంటపుడు తాను ఎన్టీఆర్ కు పోటీ ఏంటని ప్రశ్నించాడు విజయ్. నిజానికి తన సినిమాను దసరా సెలవుల్లో రిలీజ్ చేయాలన్నది తన కోరిక అని.. ఎన్టీఆర్ సినిమాకు భారీగా థియేటర్లు వెళ్లిపోతాయి కాబట్టే దసరా సెలవుల్లో రిలీజ్ చేయలేక ముందుకు వచ్చినట్లు విజయ్ చెప్పాడు. తాము అక్టోబరు 5నే రావడానికి ఇంకా రకరకాల కారణాలున్నాయన్నాడు. ఇది కూడా అభిమానుల పోల్ ద్వారా నిర్ణయించిన డేట్ అని విజయ్ చెప్పాడు.