అర్జున్ రెడ్డికీ బ్యాక్ లాగ్స్ బాధ

అదేంటీ.. అర్జున్ రెడ్డి యూనివర్సిటీ టాప్ కదా.. బ్యాక్ లాగ్స్ ఏంటీ అనుకుంటున్నారా.. అర్జున్ రెడ్డి మూవీతో విజయ్ దేవరకొండకు దాదాపుగా స్టార్ ఇమేజ్ వచ్చేసింది. యంగ్ హీరోస్ ఎంతో కష్టపడి అందుకుంటున్న ఇమేజ్ ను ఒక్కటే సినిమాతో అందుకున్నాడు. పెళ్లిచూపులు సక్సెస్ కూడా ఉన్నా.. అర్జున్ రెడ్డితో వచ్చిన క్రేజ్ ఇతడిని చాలా మెట్లు ఎక్కించేసింది. అర్జున్ రెడ్డి తర్వాత విజయ్ దేవరకొండ సినిమా కోసం జనాలు ఆత్రంగానే వెయిట్ చేస్తున్నారు.

ఈ కుర్రాడు కూడా ట్యాక్సీవాలాతో ఆడియన్స్ ను ఆకట్టుకునేందుకు ప్రిపేర్ అవుతున్నాడు. ఇంతలోనే 'ఏం మంత్రం వేశావే' అనే సినిమా వచ్చేస్తోంది. ఇదేమీ ఇప్పుడు తీసిన విషయం కాదు. ఇప్పుడీ సినిమా రిలీజ్ చేయడం కూడా విజయ్ దేవరకొండకు ఇష్టం లేదట. కానీ ఆపగలిగే పరిస్థితి లేదు. వరుసగా ఈ చిత్రానికి సంబంధించిన సాంగ్స్ రిలీజ్ చేస్తూ.. మార్చ్ 9న విడుదల తేదీ కూడా ఇచ్చారు. అయితే.. ఈ సినిమా రిలీజ్ ఐదేళ్లుగా ఆగిపోయిందనే విషయాన్ని ఫన్నీగా చెప్పుకొచ్చాడు విజయ్ దేవరకొండ.

'నాకు కూడా బ్యాక్ లాగ్స్ ఉన్నాయబ్బా.. ఇంట్లో తెలియకుండా మేనేజ్ చేద్దామని అనుకున్నా.. కానీ ఐదు సంవత్సరాల తర్వాత యూట్యూబ్ లో ట్రెండ్ అవుతోంది'అంటూ కుర్రాళ్ల భాషలోనే చెప్పుకొచ్చాడు విజయ్ దేవరకొండ. ఏం మంత్రం వేశావే అనే సినిమా ఐదేళ్ల క్రితం తాను చేసిన మూవీ అని.. దానిని తన ఇప్పటి క్రేజ్ తో పోల్చి చూడద్దంటూ ఈ హీరో చెప్పిన విధానం మాత్రం బాగుంది కదూ.