మహానటి వేదిక మీద కూడా అర్జున్ రెడ్డే..

‘అర్జున్ రెడ్డి’ సినిమా దగ్గర్నుంచి విజయ్ దేవరకొండను చాలా కొత్తగా చూస్తున్నారు జనాలు. అతను వేదికలెక్కితే చాలా ఎప్పుడేం బాంబులు పేలుస్తాడో తెలియదు. ‘అర్జున్ రెడ్డి’ విడుదలై 8 నెలలు దాటుతున్నా ఇంకా ఆ పాత్రకు తాలూకు యాటిట్యూడే చూపిస్తున్నాడు విజయ్. కాకపోతే అతడి ప్రసంగాలు చాలా ఆసక్తికరంగా ఉంటున్న మాట మాత్రం వాస్తవం. తాజాగా ‘మహానటి’ ఆడియో వేడుకలో తనదైన శైలిలో ప్రసంగించాడు విజయ్.

సమంత గురించి మాట్లాడుతున్నపుడు.. ఆమె పెద్ద స్టార్ అని.. తనతో పని చేయడం మంచి అనుభవమని అన్న విజయ్.. నాగచైతన్య తర్వాత తనకు అత్యంత నచ్చిన కోస్టార్ తానే అంటూ సమంత చాలాసార్లు చెప్పిందని విజయ్ అన్నాడు. సామ్ ఇవన్నీ చెప్పకు వేరే హీరోల ఫ్యాన్స్ ఫీలవుతారు అని తాను అన్నా కూడా ఎవ్వరు ఫీలైనా పర్వాలేదు చైతూ తర్వాత నువ్వే నా ఫేవరెట్ అని సమంత నొక్కి వక్కాణించినట్లు విజయ్ చెప్పాడు. ఈ సందర్భంలో ఆడిటోరియం హోరెత్తిపోయింది. సమంత అయినా నవ్వాపుకోలేకపోయింది.

సమంత సినిమాల్ని ఎంచుకోవడం.. నటిగా కొనసాగుతుండటం అందరి అదృష్టమని.. ఆమె ఎన్నో అద్భుతమైన పాత్రలు చేసిందని.. రీసెంట్ గా ‘రంగస్థలం’లో తన పెర్ఫామెన్స్ తన మైండ్ బ్లాంక్ చేసిందని విజయ్ అన్నాడు. ఇక ‘మహానటి’లో సావిత్రి-జెమిని గణేశన్ పాత్రలు చేసిన కీర్తి-దుల్కర్ ల కాంబినేషన్లో ఒక సీన్ తాను ఎడిట్ రూంలో దర్శకుడు నాగ్ అశ్విన్ కు తెలియకుండా చేశానని.. వాళ్లు అద్భుతంగా నటించారని చెప్పాడు విజయ్.