సిక్సర్ కొట్టే ప్రయత్నం చేశా.. బంతి గాల్లో ఉందన్నాడు

ఆసక్తికర వ్యాఖ్యలు చేశారు యూత్ స్టార్ విజయ దేవరకొండ. టాలీవుడ్ లో చాలామంది హీరోలు ఉన్నా.. తెలుగు ప్రేక్షకుల్ని అందునా.. యూత్ ను అమితంగా ఆకర్షించిన నటులు కొందరు. ఇటీవల కాలంలో అలాంటి ఇమేజ్ ను సొంతం చేసుకున్నాడు రీల్ అర్జున్ రెడ్డి.. రియల్ విజయ దేవరకొండ. నాకు నచ్చినట్లే ఉంటా? నాకు తోచిందే చేస్తానన్నట్లుగా నిర్లక్ష్యంగా.. రఫ్ గా ఉండే విజయ్ ను ఆయన అభిమానులు రౌడీ అంటూ ముద్దుగా పిలుచుకోవటం తెలిసిందే.

తాజాగా అతడు నటించిన వరల్డ్ ఫేమస్ లవర్ మూవీ ఈ వారం విడుదల కానుంది. ఈ నేపథ్యం లో ప్రిరిలీజ్ ఫంక్షన్ చేశారు. తన సినిమా ఫలితం గురించి విజయ్ ఆసక్తి కరంగా చెప్పారు. నాలుగేళ్ల క్రితం తాను పెళ్లిచూపులు అనే సినిమా లో హీరోగా నటించానని.. అప్పటి నుంచి తనను ప్రేక్షకులు ఆదరిస్తూనే ఉన్నారన్నారు.నాలుగేళ్లలో ఏడు సినిమాలు చేస్తే..కొన్ని హిట్లు అయితే.. మరికొన్ని మిస్ అయ్యాయన్న విషయాన్ని నిజాయితీగా ఒప్పుకున్నాడు.

తనకు సింగిల్స్.. డబుల్స్ తీసే ఓపిక లేదని.. తన ప్రతి సినిమా సిక్సర్ కొట్టాలనే ప్రయత్నిస్తానని చెప్పారు. ఇటీవల తాను చేసిన ఒకటి సిక్సర్ కొట్ట లేకపోయిందన్న ఆయన.. వరల్డ్ ఫేమస్ లవర్ సినిమా తో సిక్స్ కొట్టాలనే ప్రయత్నం చేశానని.. ప్రస్తుతం బంతి గాల్లో ఉందని.. సిక్సా? కాదా? అన్నది ప్రేక్షకులే తేల్చాలన్నారు. మరి.. రౌడీ ప్రయత్నానికి ప్రేక్షకులు ఎలాంటి తీర్పునిస్తారో చూడాలి.