ప్రీ లుక్ః టాక్సీవాలా.. పేరొక్కటే లేటు!

అర్జున్ రెడ్డితో అపరిమితమైన క్రేజ్ సాధించేసిన యంగ్ హీరో విజయ్ దేవరకొండ నెక్ట్స్ మూవీ ఎప్పుడు వస్తుందా అని ఫ్యాన్స్ ఉత్సాహంగానే ఎదురుచూస్తున్నారు. కుర్రకారులో తెగ ఇమేజ్ పొందిన ఈ హీరో సినిమాపై ఇండస్ట్రీలో కూడా మంచి బజ్ కనిపిస్తోంది. విజయ్ దేవరకొండ హీరోగా రాహుల్ సాంక్రిత్యన్ దర్శకత్వంలో రూపొందుతున్న సినిమా ఇప్పుడు రిలీజ్ కి రెడీ అయిపోతోంది.

యూవీ క్రియేషన్స్.. గీతాఆర్ట్స్2 బ్యానర్ పై రూపొందిన చిత్రానికి ఇప్పుడు ప్రీ లుక్ రిలీజ్ చేశారు. ఫుల్ స్పీడ్ లో వెళుతున్న కారు మాత్రమే ఈ పోస్టర్ లోకనిపిస్తుంది. ఇందులో నటీనటులు ఎవరినీ పరిచయం చేయలేదు. కానీ ఈ పోస్టర్ చూస్తుంటే మాత్రం రేసింగ్ గుర్తుకు రావడం ఖాయం. రేసీ స్క్రీన్ ప్లే అనే ఇండికేషన్ వచ్చేలా డిజైన్ చేసిన తీరు బాగుంది. పైగా ఇలాంటి ప్రీ లుక్ పోస్టర్లలో ఫస్ట్ లుక్ డేట్ ఇవ్వడం ఆనవాయితీ. కానీ ఈ మూవీ టీం మాత్రం ఫస్ట్ లుక్ ఏదో ఒక రోజు సడెన్ గా ఇచ్చేస్తాం అని అర్ధం వచ్చేలా చెప్పడం విశేషం. ఇక ఈ చిత్రంలో విజయ్ దేవరకొండ ట్యాక్సీ డ్రైవర్ గా నటిస్తున్నాడంటూ ముందు నుంచి వార్తలు ఉన్నాయి.

అందుకు తగ్గట్లుగానే ఈ పోస్టర్ ఉండగా.. ట్యాక్సీవాలా అనే టైటిల్ ను పరిశీలిస్తున్నట్లుగా తెలుస్తోంది. ఇదే విషయాన్ని ఫస్ట్ లుక్ లో అనౌన్స్ చేసే అవకాశాలు ఉన్నాయి. ఈ చిత్రంలో మాళవికా నాయర్.. ప్రియాంక జవల్కర్ హీరోయిన్లుగా నటిస్తున్నారు.