ఇండియన్ ఐడల్ ఫైనలిస్ట్ షణ్ముఖ ప్రియకు విజయ్ దేవరకొండ విషెస్..!

పాపులర్ సింగింగ్ రియాలిటీ షో ''ఇండియన్ ఐడల్ 2021'' గ్రాండ్ ఫినాలే లో ఫైనలిస్ట్ గా ఉన్న మన తెలుగమ్మాయి షణ్ముఖ ప్రియ కు సెన్సేషనల్ స్టార్ విజయ్ దేవరకొండ ఓ వీడియా ద్వారా బెస్ట్ విషెస్ అందించి సర్ ప్రైజ్ చేశాడు. దేశవ్యాప్తంగా సింగింగ్ టాలెంట్ ని బయటకు తీసే ఇండియన్ ఐడల్ షోలో ఫైనల్ సిక్స్ కంటెస్టెంట్స్ లో షణ్ముఖ కూడా ఉంది. ఓ తెలుగమ్మాయి ఈ షో లో ఫైనల్ చేరుకోవడం ఇదే మొదటిసారి అని చెప్పవచ్చు.

షణ్ముఖ ప్రియ ఈ షో లో భాగంగా తాను హీరో విజయ్ దేవరకొండ కు పెద్ద ఫ్యాన్ అనీ.. విజయ్ సినిమాలో పాడటమే తన కోరిక అని నిర్వాహకులకు తెలిపింది. ఈ విషయాన్ని సోనీ టీవి వాళ్లు విజయ్ కు తెలియజేయడంతో.. రౌడీ హీరో విజయ్ ఓ ప్రత్యేకమైన వీడియో సందేశం అందించాడు. ఈ ప్రోగ్రామ్ జరగుతున్నప్పుడే ఆ వీడియోని ప్లే చేసి షణ్ముక ప్రియను సర్ ప్రైజ్ చేశారు.

ఈ వీడియోలో విజయ్ దేవరకొండ మాట్లాడుతూ.. షణ్ముఖ ప్రియ తప్పకుండా 'ఇండియన్ ఐడల్ 12' టైటిల్ గెలవాలని.. ఆమెకు బెస్ట్ విషెస్ అందించారు. షణ్ముఖ పర్ఫామెన్సెస్ తాను చూస్తుంటానని.. ఖచ్చితంగా టైటిల్ గెలుస్తుందని అభిప్రాయపడ్డాడు. హైదరాబాద్ తిరిగి రాగానే తనని కలవాలని.. టైటిల్ గెలిచినా గెలవకపోయినా తన నెక్స్ట్ సినిమాలో సాంగ్ పాడే అవకాశం ఇస్తానని షణ్ముఖ ప్రియ కు విజయ్ మాట ఇచ్చారు.

'లైగర్' స్టార్ విజయ్ దేవరకొండ పంపించిన స్పెషల్ వీడియో సందేశం చూడగానే షణ్ముఖ ప్రియ ఉబ్బితబ్బిబైపోయింది. షణ్ముక ప్రియ పేరెంట్స్ ఆనందంలో మునిగిపోయారు. షణ్ముక కు విజయ్ ఆఫర్ ఇవ్వటాన్ని షోలో ఉన్న కంటెస్టెంట్ లు, గెస్ట్ లు, జడ్జీలు అందరూ చప్పట్లతో అభినందించారు. దీనికి సంబంధించిన 'ఇండియన్ ఐడల్ 12' ప్రోమోని సోనీ టీవీ వారు విడుదల చేశారు. ప్రస్తుతం ఈ వీడియో నెట్టింట వైరల్ అవుతోంది.