మళ్లీ పిచ్చెక్కించిన దేవరకొండ

విజయ్ దేవరకొండ ఏం చేసినా సంచలనమే. వేదికలెక్కినపుడు అతడి ప్రతి మాటను.. ప్రతి చేష్టనూ జనాలు ఆసక్తికరంగా వింటారు. చూస్తారు. మిగతా హీరోలకు భిన్నంగా వ్యవహరించడం ద్వారా అతను తన ప్రత్యేకతను చాటుకుంటూ ఉంటాడు. అప్పటికప్పుడు స్పాంటేనియస్ గా అతను మాట్లాడే మాటలు.. చేష్టలు కుర్రాళ్లకు భలే నచ్చుతుంటాయి. తాజాగా భీమవరంలో నిర్వహించిన ‘ట్యాక్సీవాలా’ సక్సెస్ మీట్లో విజయ్ మరోసారి తన ప్రత్యేకతను చాటుకున్నాడు. ‘ట్యాక్సీవాలా’ సినిమా విడుదలకు ముందు సకల దరిద్రాలూ చూశామని.. ఈ సినిమా దాదాపుగా చచ్చిపోయిందని.. అలాంటి సినిమాను ప్రేక్షకులు ఇంత బ్లాక్ బస్టర్ చేయడం ఆశ్చర్యమని అన్నాడు విజయ్.

విడుదలకు ముందు తాను తన టీం పడ్డ కష్టం గురించి వివరిస్తూ.. వాళ్ల జీవితాలు ఈ సినిమాతో ముడిపడి ఉన్నాయని చెబుతూ.. థియేటర్లకు వెళ్లి సినిమా చూడాలని కోరానని.. ఆ మాటను మన్నించి జనాలు థియేటర్లను నింపిన తీరు అద్భుతమని అతనన్నాడు. కాబట్టి ఈ విజయం జనాలదని అతనన్నాడు. మధ్యలో మాట్లాడుతూ మాట్లాడుతూ.. చిన్న బ్రేక్ ఇచ్చి అతను సక్సెస్ సెలబ్రేషన్స్ చేసుకున్న తీరు అభిమానులకు మామూలు కిక్కివ్వలేదు. థగ్ లైఫ్ అంటే ఏంటో చూపించాడు విజయ్. వెరైటీ కళ్ల జోడు ధరించి.. బ్యాగ్రౌండ్ స్కోర్ వేయించుకుని.. లైటింగ్ ఎఫెక్ట్స్ మధ్య వెరైటీ డ్యాన్స్ చేశాడు. ఆ సందర్భంగా కొంచెం విజయ గర్వం కనిపించినప్పటికీ.. అనేక అడ్డంకుల్ని దాటి ‘ట్యాక్సీవాలా’ ఇంత పెద్ద సక్సెస్ అయిన నేపథ్యంలో విజయ్ ఇలా చేయడాన్ని అర్థం చేసుకోవచ్చు. తాను మళ్లీ బౌన్స్ బ్యాక్ అవుతునానన్నా కూడా జనాలు నమ్మలేదని.. ‘ట్యాక్సీవాలా’ కూడా పోతుందని.. విజయ్ గాడు షెడ్డుకెళ్లిపోతాడని కామెంట్లు చేశారంటూ తన మీద తానే జోకులు కూడా వేసుకున్న విజయ్.. జనాల్ని భలేగా ఎంటర్టైన్ చేశాడు.