మినీ కామ్రేడ్ వస్తున్నాడు

పది సినిమాలు పూర్తి కాకుండానే స్టార్ ఓపెనర్ గా మారిన విజయ్ దేవరకొండకు యూత్ లో ఎంత ఫాలోయింగ్ ఉందో ప్రత్యేకంగా చెప్పనక్కర్లేదు . రీజనబుల్ బడ్జెట్ లో తీస్తే యావరేజ్ కంటెంట్ తో నిర్మాతలకు లాభాలు ఇవ్వగలనని ప్రూవ్ చేసిన విజయ్ కు గీత గోవిందం ఏకంగా టాప్ ఇండస్ట్రీ హిట్స్ లో చోటు దక్కించుకోవడం స్టార్లను సైతం షాక్ కి గురి చేసింది. 40 కోట్ల మార్కు ఇంత ఈజీనా అనిపించేలా దాని రేంజ్ ఎక్కడికో వెళ్ళింది.

ఇప్పుడొస్తున్న కొత్త సినిమా డియర్ కామ్రేడ్. భరత్ కమ్మ అనే డెబ్యు డైరెక్టర్ తో మైత్రి మూవీ మేకర్స్ బిగ్ బెన్ సినిమాస్ సంయుక్తంగా నిర్మిస్తున్న ఈ మూవీ ప్రస్తుతం పోస్ట్ ప్రొడక్షన్ లో ఉంది. ఏదో ప్యాచ్ వర్క్ బాలన్స్ అంటున్నారు కాని అది కూడా మహా అంటే ఈ నెలలోనే పూర్తవుతుందట. టీజర్ తో కామ్రేడ్ ప్రమోషన్ మొదలు పెట్టబోతున్నారు

మొదటిసారి విజయ్ దేవరకొండ సినిమా 4 బాషలలో విడుదల కానుంది. శాండల్ వుడ్ లో డబ్బింగ్ ల మీద ఆంక్షలు తొలగించడంతో డియర్ కామ్రేడ్ ను కన్నడలో సైతం రిలీజ్ చేయబోతున్నారు. మలయాళం తమిళ్ తో పాటు ఒరిజినల్ తెలుగు వెర్షన్ ఒకే తేదికి విడుదల చేసేలా ప్లానింగ్ జరుగుతోంది. 17న వదలబోయే టీజర్ కు సంబంధించి నాలుగు బాషల టైటిల్ లోగోస్ ని ఒకే పోస్టర్ ని డిజైన్ చేయడం వెరైటీగా ఉంది. స్టూడెంట్ పాలిటిక్స్ బ్యాక్ డ్రాప్ లో కమ్యునిజం ఛాయలు ఉన్న హీరో పాత్రతో విజయ దేవరకొండ కొత్తగా కనిపిస్తాడని ఇన్ సైడ్ టాక్. టీజర్ రోజే రిలీజ్ డేట్ ని ప్రకటించే అవకాశం ఉంది