లైలా ద‌ర్శ‌కుడితో బెల్లంకొండ?

స్టార్ హీరోల వార‌సుల్ని మించిపోయేంత గ్రాండ్‌ గా ఎంట్రీ ఇచ్చిన క‌థానాయ‌కుడు బెల్లంకొండ శ్రీనివాస్‌. అక్కినేని కుటుంబం నుంచి వ‌స్తున్న అఖిల్ సినిమాకి ఇప్పుడు 40కోట్లు పైనే ఖ‌ర్చ‌య్యిందంటే అవునా? అంటూ ఆశ్చ‌ర్యంగా మాట్లాడుతున్నారు కానీ... రెండేళ్ల కింద‌ట అంత‌కంటే ఎక్కువ బ‌డ్జెట్‌ తో `అల్లుడు శీను`గా త‌న త‌న‌యుడిని ప‌రిచ‌యం చేశాడు బెల్లంకొండ సురేష్‌. ఆ సినిమాని కూడా వి.వి.వినాయ‌కే తెర‌కెక్కించారు. అయితే అంత గ్రాండ్‌ గా తెర‌పైకి తీసుకొచ్చినా ఆ ఊపుని మాత్రం అలా కొన‌సాగించ‌లేక‌పోయాడు బెల్లంకొండ‌.

బోయ‌పాటి శ్రీను ద‌ర్శ‌క‌త్వంలో మొద‌లైన సినిమాని బెల్లంకొండ శ్రీనివాస్ చేసుంటే ఆ ఊపు కొన‌సాగేదేమో! అయితే ఆయ‌న కోట్ చేసిన బడ్జెట్ త‌న ద‌గ్గ‌ర లేద‌ని చెప్పి సినిమా చేయ‌లేక‌పోయాడట బెల్లంకొండ సురేష్‌. చివ‌రికి ఆయ‌న భీమ‌నేని శ్రీనివాస్ ద‌ర్శ‌క‌త్వంలో ప్రాజెక్టు ఓకే చేయించాడు. త‌మిళంలో సూప‌ర్‌ హిట్ట‌యిన సుంద‌ర పాండియ‌న్ సినిమానే బెల్లంకొండ శ్రీనివాస్‌ తో తెర‌కెక్కిస్తున్నాడు భీమ‌నేని. ఆ చిత్రం ప్ర‌స్తుతం సెట్స్‌ పై ఉంది. చాలా రోజుల కిందే మొద‌లైంది కానీ... ప్రోగ్రెస్ ఏంటో ఇప్ప‌టికీ బ‌య‌టికి రావ‌డం లేదు. షూటింగ్ జ‌రుగుతుందో లేదో కూడా ఎవ్వ‌రికీ అంతు చిక్క‌డం లేదు.

ఇక ఆ సినిమా సంగ‌తి అటుంచితే బెల్లంకొండ శ్రీనివాస్ ఇప్పుడు కొత్త‌గా మ‌రో ప్రాజెక్టుని ఓకే చేసిన‌ట్టు వార్త‌లొస్తున్నాయి. గుండెజారి గ‌ల్లంత‌య్యిందే, ఒక లైలాకోసంలాంటి హిట్టు సినిమాల్ని తీసిన విజ‌య్ కుమార్ కొండా ద‌ర్శ‌క‌త్వంలో బెల్లంకొండ త‌దుప‌రి సినిమా చేయ‌బోతున్న‌ట్టు తెలుస్తోంది. క‌న్న‌డ‌లో విజ‌య‌వంత‌మైన ఓ సినిమాకి రీమేక్‌ గా తీస్తార‌ట‌. బెల్లంకొండ సురేష్ నిర్మాణంలోనే ఆ సినిమా తెర‌కెక్క‌నున్న‌ట్టు స‌మాచారం. రీమేక్ క‌థే అయినా అందులో బోలెడ‌న్ని మార్పులు చేసుకొని రంగంలోకి దిగ‌నున్నార‌ట‌. త్వ‌ర‌లోనే ఆ సినిమా గురించి అధికారికంగా అనౌన్స్‌ మెంట్ రావొచ్చ‌ని చెబుతున్నారు.