దళపతి రికార్డును దాటేసిన ఇళయదళపతి

జీఎస్టీకి వ్యతిరేకంగా డైలాగులు ఉన్నాయని.. వైద్యుల మనోభావాలు తీసేలా మూవీ ఉందని లేటెస్ట్ తమిళ్ మూవీ మెర్సల్ ను వివాదాలు చుట్టుముట్టాయి. అవన్నీ ఆ సినిమాకు విపరీతమైన ప్రచారం తెచ్చిపెట్టాయి. దీంతో ఈ మూవీ వసూళ్లలో కొత్త రికార్డులను సృష్టిస్తోంది.

తమిళ స్టార్ హీరో.. అభిమానులు ఇళయ దళపతిగా పిలుచుకునే విజయ్ హీరోగా నటించిన మెర్సల్ మూవీ అతడి కెరీర్ లోనే అత్యధిక కలెక్షన్లు కొల్లగొట్టిన చిత్రంగా నిలిచింది. ఈ దీపావళికి మెర్సల్ థియేటర్లకు వచ్చింది. ఈ ఆరు రోజుల్లో తమిళనాడులో మొత్తం రూ. 84 కోట్లు ఈ మూవీ వసూలు చేసింది. సూపర్ స్టార్ రజనీకాంత్ కబాలీ మూవీ ఆరు రోజుల టైంలో రూ. 75.2 కోట్లు మాత్రమే వసూలు చేసింది. దీంతో తమిళనాడు వరకు రజనీ రికార్డును విజయ్ బ్రేక్ చేసినట్లయింది. వరల్డ్ వైడ్ గా మెర్సల్ ఇప్పటికి రూ. 155 కోట్లు వసూలు చేసినట్లు అంచనా.

మెర్సల్ మూవీని తెలుగులో అదిరింది పేరుతో డబ్బింగ్ చేస్తున్నారు. తమిళంతోపాటే తెలుగులోనూ రిలీజ్ చేయాలని అనుకున్నా వీలుపడలేదు. పవర్ స్టార్ పవన్ కళ్యాణ్ సన్నిహితుడైన శరత్ మరార్ ఈ మూవీ హక్కులు దక్కించుకున్నాడు. రోజులు గడుస్తున్నా తెలుగు వెర్షన్ ను థియేటర్లకు తీసుకురావడంలో ఆటంకాలు మాత్రం తొలగడం లేదు.