మళ్లీ 'మాస్టర్' దర్శకుడితోనే విజయ్ మూవీ?

తమిళనాట విజయ్ కి గల క్రేజ్ ఎలాంటిదనేది 'మాస్టర్' సినిమా మరోసారి నిరూపించింది. లోకేశ్ కనగరాజ్ దర్శకత్వం వహించిన ఈ సినిమా, సంక్రాంతి బరిలో సందడి చేసింది. కథాకథనాల పరంగా 'ఔరా!' అనిపించకపోయినా, వసూళ్ల పరంగా దూసుకుపోయింది. కలెక్షన్ల విషయంలో కొత్త రికార్డులను క్రియేట్ చేసింది. అలాంటి ఈ ఇద్దరి కాంబినేషన్లో మరో ప్రాజెక్టు సెట్ అవుతున్నట్టుగా ఒక టాక్ వినిపిస్తోంది. ఈ సినిమాను మైత్రీ మూవీ మేకర్స్ వారు నిర్మించనున్నారనేది కొసమెరుపు.

తమిళ సినిమాను అతిరథ మహారథులు నడిపిస్తూ వచ్చారు. తమిళ సినిమా కథలను తమ టేకింగ్ తో కొత్త మలుపులు తిప్పారు. అలా తమిళ సినిమాను ఒక కీలకమైన మలుపును తిప్పిన దర్శకుడిగా మురుగదాస్ కనిపిస్తాడు. ఆ తరువాత చాలామంది దర్శకులు ఎంట్రీ ఇచ్చినప్పటికీ, మళ్లీ ఆ స్థాయిలో ఒక కొత్త ఒరవడికి తెరతీసిన దర్శకుడిగా లోకేశ్ కనగరాజ్ కనిపిస్తున్నాడు. విజయ్ వంటి స్టార్ హీరో పిలిచిమరీ ఛాన్స్ ఇచ్చాడంటే ఆయన ప్రత్యేకత ఏమిటనేది అర్థం చేసుకోవచ్చు.

లోకేశ్ కనగరాజ్ టేకింగ్ డిఫరెంట్ గా ఉంటుంది. అద్భుతమైన స్క్రీన్ ప్లే తో ఆసక్తికరంగా కథను నడిపించడం ఆయన ప్రత్యేకత. అందుకు ఉదాహరణగా 'మాస్టర్'కి ముందు ఆయన చేసిన కార్తి 'ఖైదీ' .. సందీప్ కిషన్ 'మానగరం' సినిమాలు కనిపిస్తాయి. అందువల్లనే కోలీవుడ్ లోకి అడుగుపెట్టాలనుకుంటున్న మైత్రీ మూవీ మేకర్స్ వారు, అక్కడ తమ తొలి సినిమాను విజయ్ - లోకేశ్ కనగరాజ్ కాంబినేషన్లో చేయాలనే ఆలోచనలో ఉన్నట్టుగా ఫిల్మ్ నగర్లో చెప్పుకుంటున్నారు. ఒకవేళ ఈ వార్త నిజమే అయితే, ప్రస్తుతం వాళ్లు కమిట్ అయిన ప్రాజెక్టులు పూర్తయిన తరువాత .. ఈ కొత్త ప్రాజెక్టు పట్టాలెక్కుతుందేమో!