విలక్షణ నటుడు ఏ భాషనీ వదిలిపెట్టడం లేదుగా..!

మక్కల్ సెల్వన్ విజయ్ సేతుపతి గురించి ప్రత్యేక పరిచయాలు అవసరం లేదు. కెరీర్ ప్రారంభంలో చిన్న పాత్రల్లో నటించి.. తన విలక్షణమైన నటనతో నేషనల్ అవార్డ్ అందుకునే రేంజ్ కు వెళ్లిన టాలెంటెడ్ యాక్టర్ ఆయన. ఇమేజ్ చట్రంలో ఇరుక్కోకుండా స్టార్ డమ్ ని పక్కన పెట్టి నచ్చితే ఎలాంటి పాత్ర అయినా చేయడానికి సిద్ధపడే నటుడతను.

ఒకే భాషలో అటు హీరోగా ఇటు విలన్ గా నటించి ఆడియన్స్ ని మెప్పించడం ఒక్క విజయ్ సేతుపతి మాత్రమే చెల్లింది. వచ్చిన ఏ అవకాశాన్నీ వదలుకోకుండా.. భాషతో సంబంధం లేకుండా వరుసగా సినిమాలు చేసుకుంటూ వెళ్తున్నాడు. ప్రస్తుతం తమిళ తెలుగు మలయాళ హిందీ ప్రాజెక్ట్స్ తో బిజీగా గడుపుతున్నారు.

ఈ ఏడాది ప్రారంభంలో 'కడైసి వివాసాయి' సినిమాలో కనిపించిన విజయ్ సేతుపతి.. 'విక్రమ్' చిత్రంలో ప్రతినాయకుడిగా అలరించాడు. అలానే 'కాతువాకుల రెండు కాదల్' మూవీతో మంచి విజయాన్ని అందుకున్నాడు. అంతేకాదు 'మామనితన్' అనే తమిళ్ సినిమాలో.. '19(1)(a)' అనే మలయాళ చిత్రంలోనూ సేతుపతి భాగమయ్యారు.

సేతుపతి ప్రస్తుతం బాలీవుడ్ బాద్ షా షారుక్ ఖాన్ నటిస్తున్న 'జవాన్' సినిమాలో విలన్ గా చేస్తున్నాడు. కత్రినా కైఫ్ తో కలిసి 'మేరీ క్రిస్మస్' సినిమాలో నటిస్తున్న విలక్షణ నటుడు.. 'గాంధీ టాక్స్' అనే సైలెంట్ మూవీలో ప్రధాన పాత్ర పోషిస్తున్నారు. 'మా నగరం' చిత్రానికి హిందీ రీమేక్ గా తెరకెక్కుతున్న 'ముంబైకర్' లోనూ నటిస్తున్నాడు.

అలానే సందీప్ కిషన్ హీరోగా నటిస్తున్న 'మైఖేల్'.. సూరి హీరోగా రూపొందుతున్న 'విడుదలై' సినిమాలలో స్పెషల్ రోల్స్ లో విజయ్ సేతుపతి నటిస్తున్నారు. ఇక షాహీద్ కపూర్ తో కలిసి రాజ్ & డీకే రూపొందిస్తున్న 'ఫర్జి' వెబ్ సిరీస్ లోనూ టాలెంటెడ్ యాక్టర్ భాగమవుతున్నాడు.

ఇలా పలు క్రేజీ ప్రాజెక్ట్స్ చేతిలో పెట్టుకొని ఉన్న సేతుపతి.. తాజాగా మలయాళంలో మమ్ముట్టితో కలిసి నటించడానికి సిద్ధమవుతున్నట్లు తెలుస్తోంది. మణికంఠన్ దర్శకత్వంలో మమ్ముట్టి ప్రధాన పాత్రలో తెరకెక్కే సినిమాలో విజయ్ సేతుపతి విలన్ గా కనిపిస్తారని టాక్ వినిపిస్తోంది.

సేతుపతి ఇప్పటికే తెలుగులో మెగాస్టార్ చిరంజీవి 'సైరా నరసింహారెడ్డి' చిత్రంలో కీలక పాత్రలో నటించిన సంగతి తెలిసిందే. అలానే తమిళ్ లో సూపర్ స్టార్ రజనీకాంత్ 'పేట' - విశ్వనటుడు కమల్ హాసన్ 'విక్రమ్' - విజయ్ 'మాస్టర్ సినిమాల్లో విలన్ గా నటించాడు. ప్రస్తుతం బాలీవుడ్ సూపర్ స్టార్ షారుక్ చిత్రంలోనూ చేస్తున్నాడు.

ఈ క్రమంలో మలయాళ మెగాస్టార్ మమ్ముట్టి చిత్రంలో సేతుపతి నటించనున్నట్లు.. త్వరలోనే అధికారిక ప్రకటన రానున్నట్లు నివేదికలు పేర్కొన్నాయి. ఇలా ఏ ఒక్క భాషనీ వదలకుండా.. అన్ని ఇండస్ట్రీలలోని అగ్ర హీరోల సినిమాల్లో ప్రతినాయకుడిగా నటించడం ఒక్క మక్కల్ సెల్వన్ కే చెల్లిందని చెప్పాలి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.