ఉప్పెన: సేతుపతి సునామీ ఖాయమట

మెగాస్టార్ మేనల్లుడు.. సాయి ధరమ్ తేజ్ తమ్ముడు వైష్ణవ్ తేజ్ హీరోగా పరిచయం అవుతున్న చిత్రం 'ఉప్పెన'. సుకుమార్ శిష్యుడు బుచ్చిబాబు దర్శకత్వంలో తెరకెక్కుతున్న ఈ సినిమాను మైత్రీ మూవీ మేకర్స్ - సుకుమార్ రైటింగ్స్ వారు సంయుక్తంగా నిర్మిస్తున్నారు. ఈ సినిమాలో కృతి శెట్టి హీరోయిన్ గా నటిస్తోంది. తమిళ స్టార్ విజయ్ సేతుపతి ఈ సినిమాలో ఒక కీలకపాత్రలో నతిస్తున్నాడు.

ఈ సినిమాలో హీరో కంటే వెయిటేజ్ ఎక్కువగా ఉండే పాత్రను విజయ్ పోషిస్తున్నాడని సమాచారం. హీరోయిన్ తండ్రి పాత్రలో సేతుపతి కనిపిస్తాడట. పరువు ప్రతిష్ఠ.. వంశ గౌరవం కోసం బ్రతికే మనిషి.. వాటిని నిలబెట్టుకోవడానికి ఎంతదూరం అయినా పోయేందుకు వెనకాడడట. విలన్ పాత్ర ఇంత బలంగా ఉన్నప్పటికీ సినిమా కథ మాత్రం హీరోయిన్ చుట్టూనే తిరుగుతుందట. విజయ్ సేతుపతి నటన సంగతి అందరికీ తెలిసిందే. హీరో హీరోయిన్లు కొత్తవారు కాబట్టి విజయ్ తన నటనతో వారిని డామినేట్ చేయడం ఖాయమే. అయితే ఇలాంటి నటుడితో నటించడం వైష్ణవ్ కు ఒక లెర్నింగ్ ఎక్స్ పీరియన్స్ అని చెప్పడంలో ఏమాత్రం సందేహం లేదు.

సాధారణంగా డెబ్యూ హీరోలకు ఎప్పుడూ ఒక సింపుల్ కమర్షియల్ లవ్ స్టోరీని ఎంచుకుంటారు. అయితే ఈసారి మాత్రం రొటీన్ కు భిన్నంగా ఇంటెన్స్ లవ్ స్టోరీని ఎంచుకోవడం మెచ్చుకోవాల్సిన విషయమే. అయితే ఈ సినిమా ఎంతవరకూ ప్రేక్షకులను మెప్పిస్తుందో వేచి చూడాలి. ఈ సినిమాకు దేవీ శ్రీ ప్రసాద్ సంగీతదర్శకుడు. ఏప్రిల్ 2 న 'ఉప్పెన' సినిమాను ప్రేక్షకుల ముందుకు తీసుకొస్తున్నారు.