సక్సెస్‌ కానుకగా 96 నెంబర్‌ బుల్లెట్‌

గత ఏడాది తమిళ బాక్సాఫీస్‌ వద్ద సందడి చేసిన ప్రముఖ చిత్రాల్లో '96' ముందు వరుసలో ఉంటుంది. ఒక సాదారణ చిత్రంగా విడుదలైన '96' చిత్రం కనీవినీ ఎరుగని రీతిలో భారీ విజయాన్ని సొంతం చేసుకుంది. సినిమా పండుగ కానుకగా టీవీలో వచ్చిన తర్వాత కూడా థియేటర్లలో ప్రదర్శింపబడింది అంటే ఏ స్థాయిలో 96 చిత్రం ఆడిందో ప్రత్యేకంగా చెప్పనక్కర్లేదు. విజయ్‌ సేతుపతి కెరీర్‌ లోనే నిలిచి పోయే సినిమాగా 96 విజయాన్ని సొంతం చేసుకుంది. త్రిష హీరోయిన్‌ గా నటించిన ఈ చిత్రంకు ప్రేమ్‌ కుమార్‌ దర్శకత్వం వహించాడు.

సక్సెస్‌ ఇచ్చిన దర్శకులకు హీరోలు కానుకలు ఇవ్వడం సర్వ సాదారణం. అలాగే తనకు '96' వంటి భారీ విజయాన్ని అందించినందుకు గాను ప్రేమ్‌ కుమార్‌ కు విజయ్‌ సేతుపతి బుల్లెట్‌ ను బహుమానంగా ఇచ్చాడట. తాజాగా మూడు లక్షలకు పైగా ఖర్చు చేసి బుల్లెట్‌ బైక్‌ ను కొనుగోలు చేసి - దానిని 0096 అనే నెంబర్‌ తో రిజిస్ట్రర్‌ చేయించి మరీ ప్రేమ్‌ కుమార్‌ కు విజయ్‌ సేతుపతి బహుమానంగా ఇచ్చాడట.

ఒక వైపు హీరోగా నటిస్తూనే మరో వైపు క్యారెక్టర్‌ ఆర్టిస్టుగా వరుసగా చిత్రాలు చేస్తున్న విజయ్‌ సేతుపతి ప్రస్తుతం తెలుగులో రూపొందుతున్న ప్రతిష్టాత్మక మెగాస్టార్‌ చిరంజీవి 151వ చిత్రం 'సైరా నరసింహారెడ్డి'లో కీలక పాత్ర పోషిస్తున్నాడు. ఇంకా నాలుగు అయిదు సినిమాల్లో విజయ్‌ సేతుపతి నటిస్తున్నాడు. నటుడిగా చాలా బిజీగా ఉన్న విజయ్‌ సేతుపతి తనకు సక్సెస్‌ ఇచ్చిన ప్రేమ్‌ కుమార్‌ కు రాయల్‌ ఎన్‌ ఫీల్డ్‌ బుల్లెట్‌ బైక్‌ ను బహుమానంగా ఇవ్వడం తమిళ సినీ వర్గాల్లో చర్చనీయాంశం అయ్యింది. ప్రస్తుతం ప్రేమ్‌ కుమార్‌ తెలుగు '96' రీమేక్‌ పనుల్లో ఉన్నాడు. తెలుగులో శర్వా హీరోగా సమంత హీరోయిన్‌ గా నటించబోతున్నారు.