'ఉప్పెన' విలన్ ..అదెలా ఒప్పుకున్నాడు?

'రాయణం'గా విజయ్‌ సేతుపతి ఓ కీలకపాత్ర పోషించి, మెప్పించిన చిత్రం 'ఉప్పెన'. బుచ్చిబాబు దర్శకత్వం వహించిన ఈ సినిమాలో హీరోయిన్ తండ్రి పాత్రలో, ఓ విలన్ గా ఆయన నటన తెలుగువారిని ఎంతగానో ఎట్రాక్ట్ చేసింది. బాక్సాఫీస్‌ వద్ద భారీ వసూళ్లు రాబట్టిన ఈ సినిమా ఇటీవల నెట్‌ఫ్లిక్స్‌ వేదికగా ప్రేక్షకుల ముందుకు వచ్చి అక్కడ పెద్ద హిట్ అయ్యింది. ఈ నేపధ్యంలో విజయ్ సేతుపతికి తెలుగు నుంచి కూడా వరస ఆఫర్స్ వస్తున్నాయి. అయితే ఆయన చిత్రగా ఓ టీవీ షోకు హోస్ట్ గా ఒప్పుకుని షాక్ ఇచ్చారు.

కెరీర్ లో ఫామ్ లో ఉండగానే నాలుగు ఆఫర్స్ వస్తాయి. అప్పుడే నాలుగు రాళ్లు వెనకేసుకోవాలని స్టార్స్ కు బాగా తెలుసు. అందుకే వాళ్లను వెతుక్కుంటే వచ్చే ఆఫర్స్ లో కొన్నిటిని పేమెంట్ చూసి సైన్ చేసేస్తారు. మిగతావాళ్లకు ఎలా సైన్ చేసాడబ్బా అనే సందేహం కలగ చేస్తారు. ఇప్పుడు తెలుగు,తమిళ భాషల్లో దూసుకుపోతున్న విజయ్ సేతుపతి ఇప్పుడు ఓ టీవి షోని ఓకే చేసారు. సన్‌ టీవీలో ప్రసారమయ్యే మాస్టర్‌ చెఫ్‌ తమిళ్‌కు హోస్ట్‌గా వ్యవహరించనున్నాడు. ఈ మేరకు సన్‌ టీవీ ఇటీవలే ఓ ప్రోమోను కూడా రిలీజ్‌ చేసింది.

ఇక ఇంత బిజీలో ఉంటూ విజయ్ సేతపతి.. మాస్టర్‌ చెఫ్‌ ని హోస్ట్ చేసేందుకు ఓకే చేయటం ఓ వింతగా చెప్పుకుంటూంటే.. విజయ్ కి ఎంత పారితోషకం ఇచ్చారనేది మరో హాట్ టాపిక్ గా మారింది. విజయ్ ని ఈ షో కి రప్పించేందుకు నిర్వాహకులు భారీ పారితోషికం ఆశ చూపారని తమిళ మీడియాలో ప్రచారం జరుగుతోంది. ఇది తను సినిమా కోసం తీసుకునేదాని కన్నా ఎక్కువగా ఉండటంతో వెంటనే గ్రీన్‌ సిగ్నల్‌ ఇచ్చినట్లు వార్తలు వస్తున్నాయి. అయితే అది ఎంత మొత్తం అనేది మాత్రం బయిటకు రాలేదు. గతంలోనూ ఆయన ఇదే సన్‌ టీవీలో నామూరు హీరో అనే షోకు వ్యాఖ్యాతగా వ్యవహరించాడు. తాజాగా ఆయన నటించిన 'విజయ్‌ సేతుపతి' సినిమా ఆహాలో ఈ రోజు నుంచి నుంచి ప్రసారం అవుతోంది.