పుష్ప‌క విమానాన్ని మ‌రిపిస్తార‌ట‌!

విభిన్నమైన సినిమాలు, పాత్ర‌ల‌తో ప్ర‌త్యేక‌త‌ను చాటుకుంటూ విల‌క్ష‌ణ న‌టుడిగా ప్ర‌త్యేక గున్తింపుని సొంతం చేసుకున్నాడు విజ‌య్ సేతుప‌తి. ప్ర‌స్తుతం బాలీవుడ్ బాద్ షా షారుఖ్ ఖాన్ తో `జావాన్‌` లో న‌టిస్తున్న విజ‌య్ సేతుప‌తి తాగా ఓ సైలెంట్ మూవీని చేస్తున్న‌ట్టుగా తెలిసింది. బ్లాక్ కామెడీ నేప‌థ్యంలో క‌మ‌ల్ హాస‌న్, అమ‌ల జంట‌గా సింగీతం శ్రీ‌నివాస‌రావు ప్ర‌మోగాత్మ‌కంగా రూపొందించిన మూకీ సినిమా `పుష్ప‌క విమానం`.

1987లో విడుద‌లైన ఈ మూవీ అప్ప‌ట్లో సంచ‌ల‌నం సృష్టించింది. మ‌ళ్లీ ఇన్నేళ్ల‌కు ఇదే త‌ర‌హాలో సైలెంట్ మూవీని విజ‌య్ సేతుప‌తితో చేస్తున్నారు. `గాంధీ టాక్స్‌` అనే టైటిల్ తో ప్ర‌యోగాత్మ‌కంగా రూపొందుతున్న ఈ మూవీలోని కీల‌క పాత్ర‌ల్లో అర‌వింద‌స్వామి, అదితీ రావు హైద‌రీ న‌టిస్తున్నారు. కిషోర్ . పి బోలేక‌ర్ ద‌ర్శ‌క‌త్వం వ‌హిస్తున్నారు. మూకీ సినిమాగా రూపొందుతున్న ఈ మూవీ ప్ర‌స్తుతం చిత్రీక‌ర‌ణ ద‌శ‌లో వుంది.

ఆదివారం ఈ మూవీకి సంబంధించిన విశేషాల్ని చిత్ర బృందం వెల్ల‌డించింది. అంతే కాకుండా ప‌రిచ‌య వీడియోని కూడా విడుద‌ల చేసింది. డార్క్ కామెడీ నేప‌థ్యంలో మూకీ సినిమాగా జీ స్టూడియోస్ , క్యూరియ‌స్ డిజిట‌ల్ ప్రైవేట్ లిమిటెడ్‌, మూవీ మిల్ ఎంట‌ర్ టైన్ మెంట్ క‌లిసి సంయుక్తంగా నిర్మిస్తున్న ఈ మూవీకి ఆస్కార్ అవార్డ్ విన్న‌ర్ ఏ.ఆర్‌. రెహ‌మాన్ సంగీతం అందిస్తున్నారు. గాంధీజీ చెప్పిన మూడు కోతుల సిద్ధాంతం చెడు చూడ‌కు, చెడు మాట్లాడ‌కు, చెడు విన‌కు అనే పాయింట్ ని బేస్ చేసుకుని ఈ సినిమాని ద‌ర్శ‌కుడు తెర‌కెక్కిస్తున్న‌ట్టుగా తెలుస్తోంది.

ఆదివారం విడుద‌ల చేసిన అనౌన్స్ మెంట్ వీడియోలో ఇదే పాయింట్ ప్ర‌ధానంగా క‌నిపించింది. ఈ మూడు క్యారెక్ట‌ర్ల‌లో అర‌వింద్ స్వామి, అదితి రావు హైద‌రీ, సిద్ధార్ధ్ జాద‌వ్ క‌నిపించారు. డ‌బ్బుతో అందరిని ఆడించే పాత్ర‌లో విజ‌య్ సేతుప‌తిని ప‌రిచ‌యం చేశారు. ఈ నాలుగు పాత్ర‌లు నాలుగు భిన్న దృవాలుగా క‌నిపిస్తున్నాయి. సంగీతానికి త‌ప్ప డైలాగ్ ల‌కు ఆస్కారం లేని ఈ మూవీతో `పుష్ప‌క విమానం`ని ఈ టీమ్ మ‌రిపిస్తారా? అన్న‌ది వేచి చూడాల్సిందే. ఈ మూవీని వ‌చ్చే ఏడాది ప్రేక్ష‌కుల ముందుకు తీసుకురానున్నార‌ట‌.