‘ఉప్పెన‌’లో ఆత్మ ఉంది: విజ‌య్ సేతుప‌తి

మెగా మేనల్లుడు, సాయిధరమ్ తేజ్ తమ్ముడు వైష్ణవ్ హీరోగా పరిచయం అవుతున్న మూవీ ‘ఉప్పెన’. కృతిశెట్టి హీరోయిన్ గా నటిస్తోంది. బుచ్చిబాబు సానా దర్శకత్వంలో తెరకెక్కిన చిత్రాన్ని.. సుకుమార్‌ రైటింగ్స్, మైత్రి మూవీ మేకర్స్‌ పతాకాలపై నవీన్‌ ఎర్నేని, వై.రవిశంకర్‌ నిర్మించారు. తాజాగా.. ఈ చిత్రం ప్రీరిలీజ్ ఫంక్ష‌న్ నిర్వ‌హించారు. మెగాస్టార్ ముఖ్య అతిథిగా హాజ‌ర‌య్యారు.

ఈ వేడుక‌లో కోలీవుడ్ స్టార్.. ‘ఉప్పెన’‌లో ప్ర‌త్య‌ర్థిగా న‌టించిన విజయ్ సేతుపతి మాట్లాడుతూ.. ఈ చిత్రంతోపాటు దర్శకుడు బుచ్చిబాబు గురించి చెప్పారు. ఈ సినిమా గురించి చెప్ప‌డానికి చాలా ఉంద‌న్న సేతుప‌తి.. ఈ మూవీని తెర‌కెక్కించ‌డం ద్వారా ద‌ర్శ‌కుడి కల నిజమైందని అన్నారు.

“బుచ్చిబాబు చాలా ఎమోషనల్ పర్సన్. ఆయ‌న ‘ఉప్పెన’ స్క్రిప్ట్ అద్భుతంగా ఉంది. ఈ క‌థ ఆత్మ‌ను ద‌ర్శ‌కుడు బా‌గా కాప్చ‌ర్ చేశాడు. ఈ సినిమా మంచి విజయం సాధిస్తుంది. ఇక‌, తొలి చిత్రం చేస్తున్న‌ వైష్ణవ్ తేజ్, కృతి శెట్టికి శుభాకాంక్షలు తెలియ‌జేస్తున్నాను’’ అన్నారు సేతుప‌తి.

ఇంకా మెగాస్టార్ గురించి కూడా మా‌ట్లాడారు విజ‌య్‌. ‘‘నేను చిరంజీవి సార్ ని చాలా ప్రేమిస్తున్నాను. ‘సైరా’ చిత్రం నుండి ఆయన నాపై ప్రేమను ఎల్లప్పుడూ కురిపిస్తూనే ఉన్నారు’’ అని అన్నారు సేతుపతి. ఇక, తెలుగు ప్రేక్షకుల గురించి మాట్లాడుతూ.. కరోనా తర్వాత సినిమా ఇండస్ట్రీకి ఇక్కడి ప్రేక్షకులు ఎంతగానో సహకరించారని అన్నారు. ఇటీవల విడుదలైన ‘క్రాక్’ చిత్రానికి పెద్ద విజయాన్ని అందించారు. వారికి ధన్యవాదాలు”అని సేతుపతి అన్నారు. దేవి శ్రీ ప్రసాద్ సంగీతం సమకూర్చిన ఈ చిత్రం.. ఫిబ్రవరి 12 న ప్రేక్షకుల ముందుకు రానుంది.