'విజయ్ - శివ నిర్వాణ'ల మూవీ స్టార్ట్ అయ్యేది అప్పుడేనట!!

టాలీవుడ్ రౌడీ హీరో విజయ్‌ దేవరకొండ ప్రస్తుతం డాషింగ్ డైరెక్టర్ పూరీ జగన్నాథ్ తో ఓ పాన్ ఇండియా మూవీ చేస్తున్న సంగతి తెలిసిందే. అసలే పూరీ మాస్ డైరెక్టర్.. హీరోనేమో ఇంకా మాస్.. వారిద్దరూ కలిస్తే ఎలా ఉంటుందో అభిమానులలో అంచనాలు ఓ రేంజికి చేరాయి. ఈ క్రేజీ కాంబినేషన్‌లో తెరకెక్కుతున్న ఈ పాన్ ఇండియా సినిమాకి ఫైటర్ అనే ప్రస్తుతం ప్రచారంలో ఉన్న సంగతి తెలిసిందే. కానీ అసలు టైటిల్ అది కాదని, పూరీ సినిమా టైటిల్‌ మార్చే ఆలోచనలో ఉన్నట్లు సహనిర్మాత ఛార్మి ప్రకటించింది. పూరీ కనెక్ట్స్ అండ్ ధర్మ ప్రొడక్షన్స్ సంయుక్తంగా భారీ బడ్జెట్ తో ఈ సినిమాను నిర్మిస్తున్నాయి. ఈ సినిమాలో అనన్య పాండే హీరోయిన్ గా నటిస్తోంది. ఇక ఈ సినిమాతో విజయ్‌ దేవరకొండ బాలీవుడ్ కి, అనన్య పాండే టాలీవుడ్ ఇండస్ట్రీలకు ఒకేసారి పరిచయం కాబోతున్నారు. అయితే ప్రస్తుతం షూటింగ్ కి రెడీ అవుతున్న ఈ సినిమా ఏప్రిల్ నెల వరకు పూర్తయ్యే అవకాశం ఉందని తెలుస్తుంది.

ఇదిలా ఉండగా.. 'నిన్ను కోరి' సినిమాతో ద‌ర్శ‌కుడిగా డెబ్యూ అయ్యాడు శివ నిర్వాణ‌. ఫస్ట్ సినిమాతోనే మంచి విజయం అందుకున్నాడు శివ. ఆ తర్వాత 'మ‌జిలీ' సినిమా రూపొందించి మరో సూపర్ హిట్ తన ఖాతాలో వేసుకున్నాడు. ప్రస్తుతం తన మూడో సినిమా 'ట‌క్ జ‌గ‌దీష్'ను నేచురల్ స్టార్ నానితో చేస్తున్నాడు. ఈ సినిమా షూటింగ్ చివరి ద‌శ‌కు చేరుకోవడంతో ఏప్రిల్ లో ఈ సినిమా విడుదల అయ్యే అవకాశం ఉంది. అయితే 'ట‌క్ జ‌గ‌దీష్' తర్వాత రౌడీ హీరో విజ‌య్ దేవ‌ర‌కొండతో ఓ సినిమా చేయ‌నున్నాడు శివ‌. స్టార్ ప్రొడ్యూస‌ర్ దిల్ రాజు నిర్మించ‌నున్న ఈ చిత్రానికి సంబంధించిన షూటింగ్ ఏప్రిల్ లో ప్రారంభించాల‌ని మేకర్స్ ప్లాన్ చేస్తున్నారట. ఏప్రిల్ లోపు ఇటు విజయ్ పూరీతో మూవీ కంప్లీట్ అయితే, అటు శివ నానిల సినిమా కంప్లీట్ అవుతుంది. ఆ వెంటనే వీరిద్దరి మూవీ పట్టాలెక్కే అవకాశం ఉంది. అందుకోసమే ఇలా త్వరగా షూటింగ్ కంప్లీట్ చేసే ఆలోచన చేస్తున్నారట. వీరిద్దరి మూవీకి సంబంధించిన పూర్తి వివరాలు తెలియాలంటే మరి కొంతకాలం ఆగాల్సిందే.