ఇంటికి తిరిగొచ్చిన స్టార్ హీరో కొడుకు...!

తమిళ స్టార్ హీరో విజయ్ కొడుకు జాసోన్ సంజయ్ గత నాలుగు నెలలుగా కెనడాలో చిక్కుకుపోయిన సంగతి తెలిసిందే. ఫిల్మ్ మేకింగ్ కోర్సు చేసేందుకు కెనడా వెళ్లిన జాసోన్ సంజయ్ కరోనా కారణంగా లాక్‌ డౌన్ విధించడంతో అక్కడే ఉండిపోయాడు. విదేశాల నుంచి ప్రయాణ మార్గాలు నిలిపివేయడంతో జాసోన్‌ అక్కడే ఉండిపోవాల్సి వచ్చింది. దీంతో తన కుమారుడు సంజయ్ ఆరోగ్యం గురించి విజయ్ కుటుంబ సభ్యులు ఆందోళన చెందారు. ఎప్పుడెప్పుడు పరిస్థితులు చక్కబడి సంజయ్ ఇండియాకి క్షేమంగా తిరిగొస్తాడో అని గత కొన్ని రోజులుగా ఎదురు చూస్తున్నారు.

అయితే ఇప్పుడు ప్రపంచ వ్యాప్తంగా లాక్‌ డౌన్ సడలింపుల్లో భాగంగా విదేశాలలో ఉన్న భారతీయులు స్వదేశానికి వస్తున్నారు. ఈ క్రమంలో కెనడా నుంచి విద్యార్థులను మరియు ఉద్యోగులను భారత ప్రభుత్వం స్పెషల్ ఫ్లైట్ లో తీసుకురాగా.. వారితో పాటు విజయ్ కొడుకు కూడా ఇండియాకి వచ్చారు. అయితే ప్రభుత్వ నిబంధనల ప్రకారం రెండు వారలు ఓ హోటల్‌ లో క్వారంటైన్‌ లో ఉన్నాడు జాసోన్ సంజయ్. ప్రస్తుతం క్వారంటైన్ పూర్తి చేసుకున్న జాసోన్ ఇంటికి వచ్చేసారు. దీంతో విజయ్ మరియు కుటుంబ సభ్యులు ఊపిరి పీల్చుకున్నారు.