ఇలా కూడా ప్రమోట్ చేస్తారా విజయ్ భయ్యా!

సాధారణంగా ఒక హీరో హ్యాండ్సమ్ గా ఉండటం వల్లనో .. అతని యాక్టింగ్ స్టైల్ నచ్చడం వల్లనో చాలామంది అభిమానులుగా మారిపోతుంటారు. ఈ రెండింటితో పాటు యాటిట్యూడ్ ద్వారా కూడా అభిమానులను సంపాదించుకోవచ్చనీ .. అవకాశాలను దక్కించుకోవచ్చని విజయ్ దేవరకొండ నిరూపించాడు. ప్రేక్షకులు ఆయన యాటిట్యూడ్ కి మొదటి ప్రాధాన్యతను ఇవ్వడం వలన, అప్పుడప్పుడు పలకరించే ఫ్లాపులు ఆయనను ఏమీ చేయలేకపోతున్నాయి. బడా నిర్మాణ సంస్థలు ఆయనతో పాన్ ఇండియా సినిమాలు చేయడానికి ఉత్సాహాన్ని చూపుతున్నాయి.

ఈ నేపథ్యంలో విజయ్ దేవరకొండ .. శివ నిర్వాణ దర్శకత్వంలో ఒక ప్రాజెక్టును పట్టాలెక్కించాడు. మైత్రీ మూవీ మేకర్స్ వారు ఈ సినిమాను నిర్మిస్తున్నారు. ఈ సినిమాలో కథానాయికగా సమంత కనిపించనుంది. ఇతర ముఖ్య పాత్రల్లో వెన్నెల కిశోర్ .. రాహుల్ రామకృష్ణ కనిపించనున్నారు.

హరీశ్ శంకర్ ముఖ్య అతిథిగా నిన్ననే ఈ సినిమా పూజా కార్యక్రమాలు జరుపుకుంది. సినిమాను లాంచ్ చేసే కార్యక్రమానికి హీరోయిన్లు తప్పకుండా హాజరవుతూ ఉంటారు. కానీ ఈ పూజా కార్యక్రమాలకి సమంత రాలేదు. వెన్నెల కిశోర్ .. రాహుల్ రామకృష్ణ కూడా హాజరు కాలేదు.

ఈ పూజా కార్యక్రమానికి సంబంధించిన ఫొటో బయటికి రావడంతో, సమంత ఎందుకు రాలేదు? అనే ప్రశ్న సోషల్ మీడియాలో పెరుగుతూ పోతోంది. దాంతో సరదాగా విజయ్ దేవరకొండ ఒక పని చేశాడు. ఈ పూజా కార్యక్రమాలకు సమంతతో పాటు వెన్నెల కిశోర్ .. రాహుల్ రామకృష్ణ కూడా వచ్చినట్టుగా, ముందుగా వదిలిన ఫోటోకి వాళ్ల ఇమేజ్ లను యాడ్ చేసి వదిలాడు. ఇదే అసలైన ఫొటో అనీ .. ప్రెస్ మీడియా వారు ఈ ఫొటోను షేర్ చేయాలని రిక్వెస్ట్ చేశాడు. దాంతో ఇప్పుడు ఈ ఫొటో సోషల్ మీడియాలో వైరల్ అయింది.

విజయ్ దేవరకొండ ఇలాంటి సరదా పనులే ఎక్కువగా చేస్తూ ఉంటాడని కొంతమంది నవ్వుకుంటూ ఉంటే, ఈ కార్యక్రమానికి హాజరు కాని కారణంగా సమంతను టీజ్ చేయడంలో భాగంగానే ఆయన ఇలా చేశాడని మరికొందరు అంటున్నారు. ఇంకొందరు మాత్రం 'ఇలా కూడా ప్రమోట్ చేస్తారా విజయ్?' అని అడిగేస్తున్నారు.

విజయ్ ఉద్దేశమేదైనా ఈ ఫొటోలో సమంత .. వెన్నెల కిశోర్ నిజంగానే హాజరైనట్టుగా ఆ ప్లేసులలో సెట్ అయ్యారు. రాహుల్ రామకృష్ణ ఇమేజ్ ఒక్కటే కాస్త తేడా కొట్టేసిందంతే. విజయ్ చేసిన ఈ పనికి సమంత .. వెన్నెల కిశోర్ ఫన్నీగా స్పందించారు. సమంత దుబాయ్ లో ఉండటం వలన రాలేకపోయిందని తెలుస్తోంది.