'విజయ రాఘవన్' టీజర్: మరో వైవిధ్యమైన సినిమాతో వస్తున్న విజయ్ ఆంటోనీ..!

కోలీవుడ్ తో పాటు టాలీవుడ్ లో కూడా మంచి ఇమేజ్ ఏర్పరచుకున్న హీరో విజయ్ ఆంటోని. విజయ్‌ ఆంటోని నటిస్తున్న లేటెస్ట్ మూవీ 'కోడియిల్‌ ఒరువన్‌' ని తెలుగులో ''విజయ రాఘవన్'' పేరుతో రిలీజ్ చేయనున్నారు. 'మెట్రో' ఫేమ్ ఆనంద కృష్ణన్‌ ఈ చిత్రానికి దర్శకత్వం వహిస్తున్నారు. ఇన్ఫినిటీ ఫిల్మ్‌ వెంచర్‌ సమర్పణలో చెందూర్ ఫిల్మ్‌ ఇంటర్నేషనల్‌ బ్యానర్‌ పై టి.డి.రాజా - డి.ఆర్‌.సంజయ్‌ కుమార్ ఈ చిత్రాన్ని నిర్మిస్తున్నారు. దీపావళి సందర్భంగా విడుదల చేసిన ఈ చిత్ర ఫస్ట్‌ లుక్‌ మంచి స్పందన తెచ్చుకుంది. నూతన సంవత్సరాన్ని పురస్క‌రించుకుని ఈ సినిమా టీజ‌ర్‌ ను శ‌నివారం చిత్ర‌ యూనిట్ విడుద‌ల చేసింది.

'ఎవ‌డ‌య్యా వాడు' అని ఓ వ్యక్తి అడిగిన‌ ప్ర‌శ్న‌కు.. 'పేరు విజ‌య రాఘ‌వ‌న్ అండి.. మా ఏరియా ట్యూష‌న్ మాస్ట‌ర్' అని హీరో పాత్రను పరిచయం చేయడంతో టీజ‌ర్ మొద‌లైంది. విజయ్ విలన్స్ తో డీ కొట్టే సన్నివేశాలు.. సాంగ్స్ కి స్టెప్పులేయడం.. 'గాజుముక్క కూడా వేస్టేరా.. కానీ కంట్లో పడితే రక్తంగా మారుతుంది' వంటి డైలాగ్స్ ఆకట్టుకుంటున్నాయి. ఇక దీనికి మ్యూజిక్ డైరెక్టర్ నివాస్ కె ప్రసన్న అందించిన 'విజయ రాఘవన్.. విజయానికే నాయకన్' అంటూ సాగే బ్యాగ్రౌండ్‌ స్కోర్ బాగుంది. మొత్తం మీద వైవిధ్యమైన సినిమాల్లో నటిస్తూ వస్తున్న విజయ్ ఆంటోనీ మరో డిఫరెంట్ మూవీతో రాబోతున్నాడని అర్థం అవుతోంది. ఈ చిత్రానికి విజయ్ ఎడిటర్ గా కూడా వర్క్ చేస్తుండటం విశేషం. ప్రస్తుతం చిత్రీకరణను జరుపుకుంటోన్న ఈ చిత్రాన్ని సమ్మర్ లో విడుదల చేసే అవకాశాలు ఉన్నాయి.