ఆ విషయంలో రష్మిక మందన్నను డామినేట్ చేసిన విజయశాంతి..

దాదాపు 13 ఏళ్ల తర్వాత తెలుగు తెరపై రీ ఎంట్రీ ఇచ్చింది లేడీ అమితాబ్ విజయశాంతి. సూపర్ స్టార్ మహేష్ బాబు హీరోగా అనిల్ రావిపూడి దర్శకత్వంలో రూపొందిన 'సరిలేరు నీకెవ్వరు' సినిమాలో భారతిగా తెలుగు ప్రేక్షకుల మనసు దోచేసింది. ఓ వైపు రికార్డు స్థాయిలో కలెక్షన్స్ రాబడుతూ దూసుకెళ్తున్న ఈ సినిమాలో విజయశాంతి నటనకు భారీ స్పందన వస్తోంది. జనవరి 11న సంక్రాంతి కానుకగా వచ్చిన ఈ సినిమాలో విజయశాంతి స్పెషల్ అట్రాక్షన్‌ గా నిలిచింది.

అయితే ఈ సినిమాలో విజయశాంతిని తీసుకునేందుకు ఎన్నో ప్రయత్నాలు చేసి ఒప్పించారట డైరెక్టర్ అనిల్ రావిపూడి. ఈ మేరకు విజయశాంతికి భారీ రెమ్మ్యూనరేషన్ ఆఫర్ చేశారట. ఇందులో నటించేందుకు గాను ఆమె 2.5 కోట్లు డిమాండ్ చేయగా చివరకు 1.25 ఇచ్చి డీల్ సెట్ చేశారట.

విజయశాంతి అందుకున్న ఈ రెమ్మ్యూనరేషన్ 'సరిలేరు నీకెవ్వరు' సినిమాలో హీరోయిన్‌గా నటించిన రష్మిక మందన్న రెమ్మ్యూనరేషన్‌ కి డబుల్ అని తెలుస్తోంది. పైగా ఇటీవలి కాలంలో క్యారెక్టర్ ఆర్టిస్టులుగా నటిస్తూ మెప్పిస్తున్న సీనియర్ హీరోయిన్స్ టబు - నదియా - కుష్బూల కంటే విజయశాంతి రెమ్మ్యూనరేషనే ఎక్కువ అని ఇన్‌సైడ్ టాక్.

ఈ నేపథ్యంలో ఓ క్రేజీ అండ్ యంగ్ హీరోయిన్ కంటే విజయశాంతి ఎక్కువ రెమ్మ్యూనరేషన్ తీసుకోవడం జనాల్లో హాట్ టాపిక్‌గా మారింది. ఈ స్థాయిలో పైకం చెల్లించి కూడా 'సరిలేరు నీకెవ్వరు' అనిపించుకున్నారు అనిల్ రావిపూడి.