బాహుబలిని మించే కథ ఇస్తారా

చరిత్ర సృష్టించే విజయాలతో రాజమౌళి ఏ దర్శకుడికి సాధ్యం కానంత అప్రతిహతంగా తన జైత్ర యాత్ర కొనసాగిస్తున్న సంగతి తెలిసిందే. దానికి అతని ప్రతిభే ముఖ్య కారణమైనా ఒక చెట్టు ఎదగడానికి మూలం విత్తనం అన్నట్టు జక్కన్న సక్సెస్ లో ఆయన తండ్రి, కథకులు విజయేంద్ర ప్రసాద్ పాత్ర మర్చిపోకూడదు. మాస్ కి గూస్ బంప్స్ ఇచ్చేలా కథలు రాయడంలో ఈయన ఎంత దిట్టో బాలకృష్ణతో బి. గోపాల్ తీసిన సమరసింహారెడ్డి టైంలోనే బయట పడింది. అలాంటి ఘన విజయాలు ఆయన ఖాతాలో చాలానే ఉన్నా రాజమౌళి దర్శకుడు అయ్యాకే ఇప్పటి తరానికి విజయేంద్ర ప్రసాద్ గురించి ఎక్కువ తెలుసుకునే అవకాశం దక్కింది. తెలుగులో మాత్రమే కాక హిందీ, తమిళ్ సినిమాలకు కూడా కథలు ఇస్తున్న విజయేంద్ర ప్రసాద్ ఆ మధ్య సల్మాన్ ఖాన్ భజరంగీ భాయ్ జాన్ తో సూపర్ హిట్ కొట్టగా లాస్ట్ ఇయర్ విజయ్ తో మెర్సల్ కు కథ ఇచ్చి మరో బ్లాక్ బస్టర్ కు కారణం అయ్యారు.

ఇప్పుడు మరో బాలీవుడ్ సినిమాకు కూడా విజయేంద్ర ప్రసాద్ కథను ఇవ్వబోతున్నారు అనేది తాజా సమాచారం. కింగ్ షారుఖ్ ఖాన్ కు ఈయన చెప్పిన లైన్ నచ్చడంతో అది వర్క్ అవుట్ చేయటం గురించి సీరియస్ గానే ఆలోచనలో ఉన్నట్టు టాక్. ఇందుకోసం హైదరాబాద్ నుంచి ముంబై వెళ్లి షారుఖ్ ను ప్రత్యేకంగా కలిసిన విజయేంద్ర ప్రసాద్ చెప్పిన రివెంజ్ డ్రామా షారుఖ్ ని విపరీతంగా ఆకట్టుకుందట. ప్రస్తుతం జీరో మూవీకి కమిట్ అయిన షారుఖ్ దీన్ని సెట్స్ పైకి తీసుకెళ్ళడం గురించి సాధ్యాసాధ్యాలు చర్చిస్తున్నట్టు తెలిసింది.

విజయేంద్ర ప్రసాద్ ఇది కాకుండా రాజమౌళి కొత్త మల్టీ స్టారర్ మూవీకి కూడా స్టొరీ రెడీ చేసే క్రమంలో ఉన్నారు. టాలీవుడ్ లోనే అత్యంత క్రేజీ ప్రాజెక్ట్ గా తెరకెక్కే ఆ సినిమా కోసం మంచి మాస్ సబ్జెక్టు సిద్ధం చేసారట. కథకుడిగా ఎంత సక్సెస్ అందుకున్నా విజయేంద్ర ప్రసాద్ గారికి దర్శకుడిగా సక్సెస్ అందని పండులాగే మిగిలింది. రాజన్న యావరేజ్ దగ్గరే ఆగిపోగా శ్రీవల్లి డిజాస్టర్ అయ్యింది. షారుఖ్ సినిమాకు బాహుబలిని మించిన కథను ఇస్తారా లేక భజరంగీ భాయ్ జాన్ లాంటిది ఇస్తారా వేచి చూడాలి.