తండ్రి కొడుకుల సినిమా అప్‌ డేట్‌

తమిళ స్టార్‌ హీరో విక్రమ్‌ మరియు ఆయన తనయుడు ధృవలు కలిసి ఒక సినిమాలో నటించబోతున్నారు. అర్జున్‌ రెడ్డి రీమేక్‌ ఆధిత్య వర్మతో ప్రేక్షకులకు ఇప్పటికే హీరోగా పరిచయం అయిన ధృవ రెండవ సినిమాతోనే తండ్రితో కలిసి కనిపించబోతున్నాడు. ఈ సినిమాకు తమిళ ప్రముఖ దర్శకుడు కార్తీక్ సుబ్బరాజు దర్శకత్వం వహించబోతున్నాడు. ఈ సినిమా ప్రకటన వచ్చి చాలా కాలం అయ్యింది. కరోనా లాక్‌ డౌన్‌ కారణంగా ఇన్ని రోజులు షూటింగ్‌ కు వెళ్లలేదు. పరిస్థితులు కుదుట పడుతున్న ఈ సమయంలో షూటింగ్‌ కు వెళ్లేందుకు దర్శకుడు కార్తీక్‌ సుబ్బరాజు రెడీ అవుతున్నట్లుగా తమిళ మీడియా వర్గాల ద్వారా సమాచారం అందుతోంది.

ఈ సినిమా షూటింగ్‌ ను కొడైకెనాల్‌ లోని హిల్‌ వ్యాలీలో చేయబోతున్నారు. చిత్ర యూనిట్‌ సభ్యులు ఇప్పటికే అందుకు సంబంధించిన ఏర్పాట్లు పూర్తి చేశారు. ముఖ్యమైన నటీనటులు మాత్రమే ఈ షెడ్యూల్‌ లో పాల్గొనబోతున్నట్లుగా తెలుస్తోంది. విక్రమ్‌ 60వ సినిమా అవ్వడం వల్ల అభిమానుల్లో ప్రత్యేకమైన అంచనాలు ఉన్నాయి. గ్యాంగ్‌ స్టర్‌ నేపథ్యంలో రూపొందబోతున్న ఈ సినిమాలో విక్రమ్‌ విలన్‌ అంటూ వార్తలు వచ్చాయి. అయితే ఇప్పటి వరకు ఆ విషయమై స్పష్టత లేదు.

ధృవ హీరోగా విక్రమ్‌ విలన్‌ గా నటిస్తే సినిమా పై అంచనాలు భారీగా ఉండటం ఖాయం. తమిళంతో పాటు తెలుగులో కూడా విక్రమ్‌ కు మంచి ఫ్యాన్‌ ఫాలోయింగ్ ఉంది. కనుక ఈ మూవీని తెలుగులో కూడా విడుదల చేసే అవకాశం ఉందని ఇండస్ట్రీ వర్గాల వారు అంటున్నారు. వచ్చే ఏడాది సమ్మర్‌ చివరి వరకు సినిమాను విడుదల చేసే అవకాశం ఉందంటున్నారు.