కరుణానిధి-విక్రమ్.. బంధం ముడిపడింది

చూడ్డానికి 30-35 ఏళ్ల కుర్రాడిలా కనిపిస్తాడు తమిళ నటుడు విక్రమ్. అతడికి 50 ఏళ్లొచ్చాయంటే నమ్మడం కష్టం. అతడికి యుక్త వయసులో ఉన్న కొడుకు.. కూతురు ఉన్నారు. ఆ కూతురికి ఈ రోజు నిశ్చితార్థం కూడా జరిగిపోయింది. విక్రమ్ తనయురాలు అక్షిత ఇటీవలే ఓ అబ్బాయితో ప్రేమలో పడిందని.. ఇరు కుటుంబాలు అంగీకరించడంతో వీరి పెళ్లికి మార్గం సుగమమైందని ఈ మధ్యే వార్తలొచ్చిన సంగతి తెలిసిందే. చెన్నైలో అక్షితకు.. మను రంజిత్ అనే కుర్రాడికి ఓ స్టార్ హోటల్లో నిశ్చితార్థం ఘనంగా చేశారు. వీళ్లిద్దరి వివాహం వచ్చే ఏడాది చేయాలని పెద్దలు నిర్ణయించారు.

చెన్నైలోని ప్రముఖ సీకే బేకరీ యజమాని కొడుకే మను రంజిత్. ఈ రంజిత్ మాజీ ముఖ్యమంత్రి.. డీఎంకే అధినేత కరుణానిధికి ముని మనవడు అవుతాడు. మొత్తానికి తమిళనాట మరో ఆసక్తికర సినీ-రాజకీయ బంధం మొదలైందన్నమాట. ఈ నిశ్చితార్థ వేడుకకు విక్రమ్ కు అత్యంత సన్నిహితుడైన దర్శకుడు శంకర్ తో పాటు అనేకమంది రాజకీయ సినీ ప్రముఖులు హాజరయ్యారు. విక్రమ్ ది కూడా ప్రేమ వివాహమే కావడం విశేషం. అతడి భార్య శైలజది కేరళ. ఇద్దరూ కలిసి గురువాయూర్లోని ఓ గుడిలో పెళ్లి చేసుకున్నారు. విక్రమ్ కొడుకు ధ్రువ్.. త్వరలోనే హీరోగా పరిచయమయ్యే అవకాశముంది. అతను ప్రస్తుతం నటనలో శిక్షణ తీసుకుంటున్నాడు.