హీరో విక్రం దృష్టిలో అతడు రియల్ హీరో!

సాదారణంగా సామాన్యులు - తమ తమ అభిమానుల కళ్లల్లో సంతోషాలు నింపడానికి ఒక హీరో ప్రయత్నించాడనే వార్తలు వింటుంటాం. మరికొన్ని సందర్భాల్లో అనారోగ్యంతో మంచం పట్టిన చిన్నారి అభిమానులకు పలకరించి - వారి కోరిక తీర్చి వారితో పాటు వారి కుటుంబసభ్యులకూ ఆనందాన్ని పంచుతుంటారు. కానీ.. ఈ సారి ఒక సామాన్యుడు ఒక స్టార్ హీరో ఫ్యామిలీ లో సంతోషాన్ని నింపాడు. ఆ సామాన్యుడు చేసిన పనికి ఆ స్టార్ హీరో ఫ్యామిలీ అంతా ఆనందించడమే కాదు- ఏకంగా ఆశ్చర్యపోయారట కూడా!!

విషయానికొస్తే.. ప్రముఖ సినీ నటుడు చియాన్ విక్రం కుమార్తె అక్షితకు - డీఎంకే అధ్యక్షుడు కరుణానిధి మునిమనవడు మను రంజిత్ తో జూలై 10న నిశ్చితార్థం జరిగిన సంగతి తెలిసిందే. ఆ నిశ్చితార్దంలో రంజిత్ తన కాబోయే భార్యకు ఎంగేజ్ మెంట్ రింగ్ తొడిగారు. అయితే చెన్నైలోని సత్యం థియేటర్‌ లో జరిగిన ‘ఇరుముగన్’ ఆడియో వేడుక రోజున విక్రమ్‌ కుమార్తె అక్షిత తన ఎంగేజ్ మెంట్ ఉంగరాన్ని పోగొట్టుకున్నారు. ఈ విషయంపై విక్రమ్ - అక్షిత లు స్థానిక పోలీస్ స్టేషన్ లో ఫిర్యాదు కూడా చేశారు. ఆ ఉంగరం విలువ రూ.12లక్షలు ఉంటుందని కూడా తెలిపారు. ఈ సమయంలో తన కుమార్తె నిశ్చితార్థ ఉంగరం కనిపించకపోయేసరికి విక్రం కుటుంబం ఒకింత కలత చెందింది.

ఈ వ్యవహారంపై పోలీసులు దర్యాప్తు కొనసాగుతూనే ఉంది. అయితే ఈ లోపు చెన్నైకి చెందిన ఒక క్యాబ్ డ్రైవర్ లక్ష్మణన్ తనకారులో ఒక ఉంగరం దొరికిందంటూ విక్రం కుటుంబీకులకు ఆ ఉంగరాన్ని అందజేశాడట. దీంతో ఒక్కసారిగా అంబరాన్నంటిని సంబరాలు చేసుకున్నంత ఆనందాన్ని పొందిన విక్రం కుటుంబ సభ్యులు అతని నిజాయితీకి ఆశ్చర్యపోయారట. సుమారు రూ.12 లక్షల విలువైన ఒక ఉంగరం దొరికితే.. అతడు తిరిగి ఇంటికి తీసుకొచ్చి ఇవ్వడంతో హీరో విక్రం దృష్టిలో ఆ క్యాబ్ డ్రైవర్ రియల్ హీరో అయిపోయాడు. ఏదిఏమైనా.. ఇప్పటికైనా తన కూతురు నిశ్చతార్థ ఉంగరం లభించడంతో విక్రమ్‌ ఇప్పుడు ఖుషీగా వున్నారట!

కాగా..గత కొద్దికాలంగా రిలేషన్ షిప్ లో ఉన్న అక్షిత - మనులు పెద్దల అనుమతితో పెళ్లి చేసుకోనున్నారు. వీరి వివాహం 2017లో చేయాలని పెద్దలు నిశ్చయించారు.