చియాన్‌కి అగ్ని ప‌రీక్ష‌

చియాన్ విక్ర‌మ్‌ కి త‌మిళ్‌ - తెలుగు ఆడియెన్స్ లో ఉన్న క్రేజు గురించి ప్ర‌త్యేకించి చెప్పాల్సిన ప‌నేలేదు. సౌంద‌ర్య `9 నెల‌లు` (రాజ‌మౌళి అసిస్టెంట్ డైరెక్ట‌ర్) అనే తెలుగు చిత్రంలో స‌హాయ‌క పాత్ర‌లో న‌టించి 1500 పారితోషికం అందుకున్న విక్ర‌మ్ అటుపై కెరీర్ కోసం చేసిన పోరాటం పైనా - ఎన్నో ఒడిదుడుకులు ఎదుర్కొని ఇంతింతై అన్న చందంగా అసాధార‌ణ స్టార్‌ డ‌మ్‌ ని అందుకున్న వైనం పైనా అభిమానుల్లో నిరంత‌రం ఆస‌క్తిక‌ర చ‌ర్చ సాగుతూనే ఉంటుంది. విక్ర‌మ్ న‌టించిన అపరిచితుడు (అన్నియ‌న్ ) తెలుగు - త‌మిళ్‌ లో బంప‌ర్ హిట్‌. ఆ క్ర‌మంలోనే అత‌డి క్రేజు అమాంతం స్కైని ట‌చ్ చేసింది. మ‌ధ్య‌లో `ఐ` చిత్రం ప‌రాజ‌యం పాల‌వ్వ‌క‌పోతే అత‌డి స్టార్‌ డ‌మ్ ముందు ఇత‌ర హీరోలంతా త‌ల వొంచాల్సి వ‌చ్చేదే. విక్ర‌మ్ న‌టించిన అనువాద చిత్రం `సామి` తెలుగులో చ‌క్క‌ని వ‌సూళ్లు సాధించింది.

ఇప్పుడు ఆ సినిమాకి సీక్వెల్ రిలీజ్‌ కొస్తోంది. `సామి స్క్వేర్` అనేది టైటిల్‌. నేటి సాయంత్రం సామి స్క్వేర్ ఆడియో ఈవెంట్ ఘ‌నంగా జ‌ర‌గ‌నుంది. వ‌రుస‌గా భారీ చిత్రాల్లో న‌టిస్తూ ఫ్లాపుల‌తో డీలాప‌డిన చియాన్‌ కి బ్రేక్‌ నిచ్చే సినిమా ఇద‌ని చెబుతున్నారు. ఈ చిత్రం కోసం నిర్మాత‌ శిబు త‌మీన్స్ ఏకంగా 80కోట్ల బ‌డ్జెట్ ఖ‌ర్చు చేస్తున్నార‌ట‌. సింగం హ‌రి త‌డాఖా చూపించాలన్న క‌సితో భారీ యాక్ష‌న్ ఎంట‌ర్‌ టైన‌ర్‌ గా ఈ చిత్రాన్ని తెర‌కెక్కిస్తున్నారు. కీర్తి సురేష్ ఈ చిత్రంలో క‌థానాయిక‌గా న‌టిస్తోంది. దేవీశ్రీ ప్ర‌సాద్ అందించిన సంగీతం ఏ రేంజులో రాక్ చేస్తుందో నేటి సాయంత్రం వ‌ర‌కూ స‌స్పెన్స్‌. ఇక చియాన్ అగ్నిప‌రీక్ష‌ను ఎదుర్కొంటున్నాడు. ఈ ప‌రీక్ష‌లో అత‌డు ఎంత‌వ‌ర‌కూ నెగ్గుకొస్తాడో వేచి చూడాల్సిందే. సామి స్క్వేర్ ఫ‌స్ట్‌ లుక్ కి చ‌క్క‌ని స్పంద‌న వ‌చ్చింది. ఆడియో స‌క్సెసైతే అది సినిమాకి అస్సెట్ అవుతుంద‌న‌డంలో సందేహం లేదు.